SUATEA llama a dexar los trunfalismos na Selmana de les lletres

Con motivu de la celebración, el sindicatu d'enseñanza emitió un durísimu comunicáu en que denuncia la "nefasta política educativa" que rescampla col "trunfalismu de les celebraciones.

Nel so comunicáu, el sindicatu d'enseñanza remembra que cuando tamos metiéndonos yá en finales de cursu hai temes que siguen ensin meyorase en materia d'enseñanza del asturianu. El rsindicatu fai un repás entamado pela educación infantil, de la que diz que nun s'ufierta en tolos centros lo que supoón un incumplimientu de la llei d'Usu. En cuantes al enseñu primariu, SUATEA denuncia que l'alministración incumple un alcuerdu de plantiyes del 7 de setiembre del 2000 nel que se mandaba la presencia d'un mayestru d'asturianu a tiempu completu en tolos centros, dexándose les itinerancies de docentes ente centros como daqué escepcional. Pa SUATEA, estes itinerancies son "la norma". D'otra manera, tamién no que cinca a primaria, el sindicatu diz que se rexistra otra illegalidá consistente en poner l'asignatura nos horarios como "alternativa cultura asturiana" una etiqueta tres de la que s'escuende una consideranza mui poco seria de l'asignatura, con agrupamientos d'alumnos de distintos niveles nuna mesma clas y adelantamientos de materia que nun son llegales y que faen poco pola dignidá de l'asignatura. N'ESO y Bachilleratu SUATEA detecta tamién irregularidaes asemeyaes, en concreto, que l'asignatura namás se da como "optativa" y non como "voluntaria" una diferencia que paez de matiz pero que en realidá significa que tien de competir col restu d'asignatures optatives. Tamién se detecten otres irregularidaes de bultu, casu de dellos centros que nun señalaben la ufierta d'asturianu nel impresu de matriculación o d'otros onde s'empobinó al alumnáu qu'escoyere llingua a otres asignatures.

SUATEA fai tamién una llamada d'atención sobre la situación del asturianu n'enseñanza d'asultos, onde diz que l'alministración nin siquiera se plantega la posibilidá de que s'imparta l'asignatura.

La organización sindical, que tamién denuncia a otru nivel el que se siga ensin titulación de filoloxía asturiana o ensin que l'asturianu s'imparta nes escujeles oficiales d'idiomes, acuta un cachu importante del so comunicáu pa falar sobre la situación d'especial inestabilidá del profesoráu d'asturianu. SUATEA diz que tolos años se cambia a los profesores de centru, lo que supón un doble pilancu pa la estabilidá de la materia al vese tamién los escolinos na situación de tener cada añu un maestru distintu. SUATEA llama especialmente l'atención sobre unes declaraciones nes que'l Conseyeru d'educación Iglesias Riopedre se comprometiere a "lluchar pol reconocimientu de la especialidá d'asturianu yla catalogación de puestos nelpresente cursu" un compromisu sobre'l qu'a estes altures sigue ensin sabese nada, al dicir del sindicatu.