Suatea, Izquierda Xunida y la Xunta critiquen el Día d'Asturies del gobiernu

Estes organizaciones ficieron públicos dellos comunicaos nos qu'espeyaben les sos impresiones sobre l'actitú del gobiernu asturianu énte esti día.

Al comunicáu que sacó Izquierda Xunida'l pasáu vienres, nel que criticaba duramente l'ausencia del asturianu na cartelería del Día d'Asturies del gobiernu, súmense agora'l sindicatu de la enseñanza SUATEA y la Xunta Pola Defensa de la Llingua Asturiana. Nel comunicáu del vienres IX amosaba la so preocupación porque l'ausencia del asturianu nes celebraciones institucionales demostraben una actitues que debíen de superáse y que nun sirven pa "non sólo pa respetar l'alcuerdu políticu nel que participa Izquierda Xunida xunto col Bloque y el so positivu desarrollu, sinón tamién pa respetar lo recoyío nel actual Estatutu, na llexislación autonómica sobre la llingua asturiana y en normatives europees ya internacionales sobre llingües minoritaries.".

Pela so parte, la Xunta Pola Defensa de la Llingua Asturiana tamién aporta una visión enforma crítica con esti Día d'Asturies, pa la organización de revindicación llingüística nesti día "ignórase la realidá llingüística d'Asturies, despréciase'l so idioma nun lu usando nin siquiera nuna fecha tan simbólica como esta, faise de menos a la que ye la nuesa seña d'identidá más viva y dinámica: la llingua." Pa la Xunta tamién claro qu'esti nun ye una casu asiláu, y que ye'l resultáu de que "Al Gobiernu d'Areces da-y perceguera tolo que suponga sacalu del estáu de marxinación onde vive o almitir cualquier derechu a los sos falantes. Por eso nel debate que se ta dando sobre les reformes estatutaries Areces ta xugando esi papel vergonzosu de renunciar a esixir lo que tolos demás esixen."

El sindicatu de la enseñanaza SUATEA espurre les sos crítiques más allá de les cuestiones estrictamente llingüístiques. La organización amuesa'l so "descontentu xeneralizáu ante un gobiernu qu´en teoría tenía de facer una política d´izquierdes comprometida cola Enseñanza Pública y l´asturianización de la nuesa sociedá y qu´en la práutica nun fizo cuasi nada por meyorar esta situación." SUATEA protesta porque al so paecer "Na enseñanza siguen afogando la Escuela Pública con midíes como supresiones, contratos precarios, inestabilidá del profesoráu, modificaciones de places, mentanto caltienen los privilexos de la Enseñanza Concertada." Poro'l sindicatu convida a los sos afiliaos a participar n'actos revindicativos del Día d'Asturies onde "onde se desixa al Gobiernu un compromisu real de respetu a la nuesa identidá coleutiva, la Oficialidá de la Llingua Asturiana y toa una riestra midíes empobinaes a meyorar y garantizar una Enseñanza Pública, Asturiana, Laica y de Calidá."