Suatea fai balance del cursu escolar qu'entama güei

Esti martes echa andar el cursu escolar n'Asturies con 1,14 % menos
d'escolinos matriculaos. El sindicatu de la enseñanza Suatea presenta
una valoración dende'l puntu vista asturianu y estatal d'esti entamu.
Suatea tamién denuncia l'imcumplimientu de la llei sobre la ufierta
obligatoria del asturianu en tolos centros educativos



No que cinca al ámbitu estatal na cuestión educativa ye un
añu importante yá qu'en teoría tien que ser l'añu
de l'aprobación de la LOE. Suatea caltién la so crítica pa
con esta llei y va siguir cola "campaña entamada al conocese
l'anteproyectu col envís d'introducir cambeos nos que quede claro'l
compromisu cola escuela pública". Mirando p'Asturies el tema de la
reforma del estatutu torna a ser lo más importante pal sindicatu, y
esperar que la llingua asturiana seya "d'una vez por toes" reconocida
como llingua oficial.



Tocando cuestiones más centraes nel enseñu, Suatea quier
denunciar l'alcuerdu firmáu en branu por dalgunes organizaciones
sindicales na Mesa de la Función Pública. Pal sindicatu
independiente esti alcuerdu "viola les competencies de la Xunta de
Personal Docente, y los alcuerdos económicos algamaos queden bien llonxe
de les demandes desixíes por tolos sindicatos docentes".



Nel entamu prácticu de les clases Suatea tamién tien
delles crítiques. Ello ye que denuncia casos como nos que por exemplu
profesoráu que s'alcuentra que la so plaza asignada nun existe, o que'l
so horariu quedó reducíu nuna media xornada. Tamién se
denuncia el fechu de qu'hai centros que superen los ratios por aula
recoyíos nos alcuerdos, y que polo tanto necesiten más profesores
pa desdoblar grupos. Amás -según Suatea- sigue amenorgando la
ufierta d'optatives, especialmente d'humanidaes, y de ciclos formativos que
pasen a "privatizase" na concertada.



La llingua asturiana sigue sufriendo maltratu nel ámbitu
educativu. Suatea avisa de qué nun ye ufiertada en tolos centros como
marca la llei y les propies instrucciones d'entamu del cursu. Colo qu'al
sindicatu nun-y consta que l'alministración tea faciendo nada pa igualo,
más allá de la propaganda.