SUATEA esixe al Gobiernu la especialidá d’asturianu y que cumpla cola Llei d’Usu pa garantizar l’enseñu

|

El sindicatu educativu SUATEA esixe al Executivu de Javier Fernández la creación de la especialidá d’asturianu, lo que, recuerda, “nun ye más qu’una cuestión de voluntá política”. Tamién reclama’l cumplimientu de la Llei d’Usu.
 
Dende’l Sindicatu Unitariu y Autómo de Trabayadores de la Enseñanza d’Asturies (SUATEA) ven la creación de la especialidá como “la forma de terminar cola situación actual de desproteición del asturianu y cola discriminación del profesoráu qu’imparte esti área”, al igual qu’entienden que “ye’l camín únicu pa garantizar de forma eficaz la voluntariedá y calidá del so enseñu y el respetu, en condiciones d’igualdá de los derechos llaborales del profesoráu” de Llingua Asturiana y Gallego-asturiano. Na so opinión, la esitencia de currículos en Primaria y Secundaria, de les titulaciones nes enseñances reglaes de la Universidá d’Uviéu, y de profesoráu interín y funcionariu pa facese cargo de la enseñanza del idioma cola calidá educativa que garantiza la esistencia de la especialidad supón un avance mui importante que permite dar el siguiente pasu. “Nun ye más qu’una cuestión de voluntá política y asina lo dexa nidio l’informe últimu, fechu pol Gobiernu anterior, nel que se conclúi que nun esisten impedimentos xurídicos insalvables pa la creación de la especialidá de Llingua Asturiana”, afirma SUATEA.
 
“Nun se pue entender qu’esista un currículu del área de Llingua Asturiana pa Primaria y otru para Secundaria; que l’área s’imparta nel 90 por cientu de los centros educativos asturianos; que la nuesa llingua forme parte, coles titulaciones nueves, de les enseñances reglaes de la Universidá d’Uviéu na formación del profesoráu –Mención d’asturianu en Maxisteriu, Especialidá d’asturianu nel máster de Secundaria y Mínor en Filoloxía– y nun esista un ámbitu profesional nel que puedan acabar, en igualdá de condiciones, lo mesmo que n’otres especialidaes, la xente qu’escueya esta opción”, denuncia’l sindicatu. Otra manera, reclamen al Gobiernu del PSOE “que cumpla y faiga cumplir la Llei d’Usu y Promoción de la Llingua Asturiana que, nel so artículu.10 diz que se garantizará la enseñanza del asturianu y del gallego-asturiano en tolos niveles y graos del sistema educativu asturianu”. Pa ello, dende SUATEA demanden que s’ellaboren unes “instrucciones, nidies, d’inscripción y matriculación de la Llingua Asturiana pa tolos centros y niveles educativos, respetando la Llei d’Usu y aplicando, en tolos niveles, la sentencia qu’elimina la ratio mínima na ESO pal curso que vien”.
 
Paralización de los recortes
 
Estes declaraciones del secretariáu de SUATEA tuvieron llugar nuna rueda de prensa convocada pa espresar la so disconformidá pa colos recortes que quier establecer el Gobiernu estatal del PP en materia educativa. El sindicatu apunta que si la llei aprobada’l 17 de mayu nel Congresu s’establez de manera rigurosa supondría “la vuelta a la educación de los años 70”: aules masificaes –hasta 30 alumnos n’Educación Infantil y Primaria, hasta 36 en Secundaria y hasta 42, ampliables a 46, en Bachilleratu–, despidu d’hasta 2.000 interinos, mengua significativa de recursos pal alumnáu de necesidaes educatives especiales, numberoses escueles rurales abocaes al zarru, mengua de la oferta de modalidaes en Bachilleratu, l’abandonu de determinaos programes d’apoyu a la educación y la non implantación de los ciclos de Formación Profesional actualizaos, ente otros. “Amás del deterioru del sistema públicu educativu que suponen estes midíes y del empeoramientu de les condiciones llaborales de los docentes, los recortes tienen otra grave consecuencia: el despidu d’ente 500 y 2.000 docentes de la educación pública, un problema llaboral d’igual o mayor magnitú que’l qu’afronta güei la minería asturiana, cola que nos solidarizamos de manera incondicional”, afirmen.
 
Por esti motivu, recuerden a Fernández y a la conseyera nueva del ramu, Ana González, “que la educación asturiana nun pue soportar más recortes” y que tienen “la responsabilidá de garantizar que los servicios públicos nun van ser los que paguen l’espilfarru y les subvenciones millonaries a fondu perdíu a la banca”. Nesti contestu, SUATEA considera necesario entamar movilizaciones y llama a la participación na Marcha a Uviéu pola Escuela Pública prevista pal sábadu con salida de Xixón (6 hores) y Avilés (5.45 hores) pa coincidir a les 11.15 hores en Llugones y continuar xuntos el trayeutu hasta la Estación del Norte (Renfe), onde a les 13 hores va celebrase una manifestación.

Contador Estadistiques