SUATEA echa tamién pel Conceyu de Xixón pola so falta de compromisu col asturianu

El sindicatu d'enseñanza SUATEA emitió ayeri un comunicáu solidarizándose y sofitando al Conseyu Asesor de la Oficina de la Llingua de Xixón, qu'esti sábadu dio una rueda de prensa na que denunció'l despreciu y falta de compromisu del PSOE de Xixón pa cola política llingüística.

Suatea, que forma tamién parte del citáu Conseyu Asesor, quier manifestar a la ciudadanía de Xixón qu'apoya dafechu les declaraciones d'esti organismu que tien d'asesorar na materia al conceyu de Xixón y desíxe-y al grupu municipal socialista una respuesta clara y favoratible "al reconocimientu de los drechos llingüísticos de toles persones del conceyu de Xixón" y al grupu municipal IU-BA que s'asitie claramente en defensa de les ordenances desixendo la so aprobación enmarcada na política que surde del Plan de Normalización del gobiernu.

L'aprobación del documentu de les ordenances d'usu del asturianu en conceyu, que lleva yá añu y mediu ensin aprobase en Plenu del Conceyu dende que-y lu presentare la Oficina de la Llingua a los trés partíos presentes en conceyu (IX-BA, PP y PSOE) ye'l principal puntu de les quexes. Estes ordenances, que l'alcaldesa refugó porque-y paecíen escesives son la base pola que tendría de mandase l'emplegu del idioma pol gobiernu local y sirvir de marcu a les polítiques de normalización en conceyu.