SUATEA denuncia la perda d'aules na escuela pública

El sindicatu d'enseñanza SUATEA dio esta mañana una rueda de prensa pa valorar l'aprobación definitiva de la Llei d'Enseñanza que va tener llugar mañana en Congresu de los Diputaos y la perda d'aules na escuela pública asturiana.

Les declaraciones de los responsables del PSOE y la visita que ficiere apocayá la Vicepresidenta del Gobiernu al Vaticanu faen albidrar a SUATEA que la Llei que vaya pasar mañana per Congresu va ser "inda peor" que'l testu que s'aprobó nel primer trámite. SUATEA acusa al gobiernu de "facer una llei d'enseñanza a la midida de les patronales de la enseñanza particular y de la ilesia católica" y denuncia que-y abulta d'especial gravedá'l fechu de que "per primer vegada na historia de la educación española l'estáu abandona la so obligación d'apurrir un serviciu públicu d'enseñanza" al conseñase na Llei qu'esti serviciu va poder ufiertalu tamién la "iniciativa social" eufemismu pa definir a la enseñanza particular. El fechu de que na llei se conseñe esplícitamente l'alcuerdu cola Santa Sede como referencia no tocante a enseñu de la relixón católica tamién abulta especialmente grave en SUATEA, qu'alvierte que'l pasu de la Llei pel Senáu empeoró la redacción orixinal al falar d'una estaya única qu'amieste les enseñances de relixón, cultura y sociedá dientro de la que s'apautaríen dos opciones, una confesional y otra aconfesional.

SUATEA denuncia que'l profesoráu sía "el gran ausente" de tol testu llegal, al nun amestar la Llei nenguna meyora sobre l'anterior no tocante a condiciones llaborales del personal, y diz qu'incluso les pequeñes meyores que se llograron, dende'l so puntu de vista, nel accesu a la función pública por parte de los interinos van refugase pol desalcuerdu con elles d'otres centrales sindicales.

El sindicatu dio anuncia de que va entamar una campaña de matriculación na escuela pública como rempuesta a l'aprobación de la llei y tamién en rellación a la perda d'unidaes na escuela pública asturiana pal cursu qu'entra. SUATEA denunció nesti sentíu que'l gobiernu asturianu disvió fondos pa financiar la enseñanza particular dende la pública polo qu'afirma que "El Gobiernu tripartitu asturianu ha replantegase la educación y facer un apueste pola escuela pública asturiana". En cuantes a les cifres del tisoriazu na escuela pública, SUATEA afirma que mientres que van concertase 180 unidaes n'Infantil y Primaria, la rede pública va perder 15 unidaes nestes estayes d'enseñanza pal cursu 06-07, les más d'elles nel mediu rural. La perda d'unidaes en secundaria y bachilleratu alcanzaría les 24 unidaes, lo qu'equival al pieslle de dos Institutos de tamañu mediu.