SUATEA denuncia la desapaición de 15 ciclos de FP pal cursu qu’entra

El sindicatu d'enseñanza diz qu'en tolos llugares onde ta previsto retirar enseñances de FP esiste un centru particular que cubre la mesma ufierta educativa

El sindicatu d'enseñanza diz que la resolución espublizada en Boletín Oficial del Principáu del 14 d'avientu y na que s'incluye la ufierta de centros educativos públicos de Formación Profesional pal cursu 2005-2006 supón la desapaición de cuatro ciclos de grau mediu, cuatro de grau superior y siete d'Aniciu Profesional ensin que se cree nengún otru nuevu pa sustituyilos. El sindicatu diz que yá va un añu alvirtieron de la estinción pal cursu presente d'otres 25 especialidaes formatives de FP. El balance d'esti cursu y el qu'entra va resultar polo tanto na destrucción de 40 ciclos. Ello, según el sindicatu, nun se compensa cola creación d'otros ciclos nuevos,en cuantes que namás apaecen cinco enseñances nueves en compensación poles que desapaecen. Amás d'ello, SUATEA denuncia qu'estes enseñances esbórrense del mapa ensin qu'esista una perda d'alumnáu que lo xustifique y ello amás cuando se caltienen les subvenciones pa centros particulares qu'imparten les mesmes enseñances

Ente los estudios que'l documentu oficial fai desapaecer pal añu qu'entra ta'l módulu de FP d'esplotaciones agraries intensives de Lluces (Colunga) el d'equipos y instalaciones electrotécniques de Villaviciosa, equipos electrotécnicos de consumu en Xixón y xestión alministrativo en Grau, too estos de grau mediu. De grau superior, Llanes pierde'l d'información y comercialización turística, Llangréu'l de secretariáu, Pravia alministración y finances. Cangas del Narcea, pela so parte, queda ensin alministración de sistemes informáticos. En cuantes a les enseñances d'Aniciu Profesional, caen en Xixón operariu de calderería y servicios auxiliares d'oficina, en Grau ayudante de reparación de vehículos y auxiliar dependiente de comerciu, mientres que Llangréu pierde'l módulu d'operariu eléctricu de baxa tensión Sotrondio'l de servicios auxiliares d'oficina y Avilés el d'operariu de viveros y xardinos.