SUATEA denuncia’l nuevu recorte al profesoráu

El sindicatu d’enseñanza SUATEA vien de denunciar el nuevu recorte de Zapatero a los trabayadores públicos. La desaparición de les clases pasives va facer que’l nuevu profesoráu s’integre na Seguridá Social, en cuenta d’en MUFACE.

La posibilidá de desaparición de la xubilación voluntaria a los 60 años, la reducción de salariu na nómina o l’abolición del patrimoniu de les mutualidades; son dalgunes de les consecuencies de la desaparición de les clases pasives, daqué que va treslladar al profesoráu funcionariu de MUFACE al réxime xeneral de la Seguridá Social.

“Esta actuación unillateral del Gobiernu daña sobremanera les nueses condiciones llaborales y vien a empeorar los recortes yá aplicaos”, denuncia SUATEA, que califiquen la medida de “agresión”.

Per otru llau, el sindicatu d’enseñanza tacha de “inaceptable” el fechu de qu’esti recorte se decidiera, nes sos palabres, “a espaldes del colectivu de trabayadores del sector públicu”.

Nun aforra gastu
“Si polo que se nagua con esta medida ye recortar el déficit públicu, nun lo fai en cuantes a asistencia sanitaria”, expón SUATEA. D’esti mou, argumenten que “mientres el sistema estatal de Salú recibe una aportación de 1.041 euros por persona y añu, MUFACE recibe 688,80 euros por persona y añu”.