Suárez Laso consigue la única medaya olímpica p'Asturies en Rio

L'atleta Alberto Suárez Laso algamó la plata na so prueba de maratón nos Paralímpicos.

El calor y la humedá de Rio de Janeiro –30 graos y 66 por cientu mientres la prueba– nun foron bonos aliaos del de Riosa, que nun pudo repetir l'oru de Londres 2012. Nesta ocasión superólu'l marroquín El Amin Chentouf, que marcó un tiempu de 2 hores, 32 minutos y 17 segundos, 54 segundos menos que l'asturianu. Completó'l podiu'l xaponés Masahiro Okamura, a un minutu y 42 segundos del africanu.

L'asturianu compite na categoría T12, na que s'integren los atletes con pocu restu de visión. Tres la prueba, Suárez Laso reconoció que la competición foi “complicada pol clima” y que'l circuitu de cincos pasos na playa de Copacabana foi mui esixente psicolóxicamente: "Cada vuelta se facía más dura y con rivales mui fuertes”, señaló.

“Corrí intentando nun facer cambios de ritmu pa que les piernas nun sufrieran y intentar aguantar hasta'l final”, siguió pa depués amosar la so satisfaición pola medaya nun "añu complicáu coles lesiones”. El de Riosa suma, poro, una plata al so palmarés, onde tamién destaca un campeonatu del Mundu nel 2011 n'Ōtautahi/Christchurch y ún d'Europa nel 2014 n'Abertawe/Swansea.

Na semeya, Suárez Laso –a la izquierda– nel podiu xunto a Chentouf y Okamura.