Stoned Atmosphere presenta esta selmana'l so nuevu discu

Stoned Atmosphere son yá una auténtica revelación nel mundu del Hip Hop. Esti grupu asturianu, anque nun lo paeza, van presentar el que yá ye'l so cuartu trabayu discográficu, ISSUE 4, discu que puede ser un auténticu reblagu de promoción pa esta promesa confirmada n'Asturies. Asturies.com falamos con Fran, cantante del grupu, sobre esti discu.

ISSUE 4 representa la continuación musical del proyectu personal de los miembros del grupu de la cuenca'l Nalón Stoned Atmosphere. Asina, la pareya que forma Stoned Atmosphere, Arma X (Fran) cola voz y Ceeris nes bases, tán énte'l retu del so primer discu espublizáu por una casa discos. Anque esti nun va ser l'estrenu discográficu de Stoned, porque estos asturianos yá fueron toa un sorpresa colos sos trés anteriores trabayos, ISSUE1, 2 Y 3 respectivamente. El proyectu Stoned Atmosphere surdió d'ente l'océanu de maquetes colgaes d'internet con estes maquetes, y rescamplaron algamando númberos de descargues d'auténticu record. Darréu d'esti éxitu na rede, el grupu entamó a xubise cada vez más nos escenarios, p'acabar agora sacando esti ISSUE 4, trabayu discográficu peresperáu por munchos aficionaos al Hip-Hop y a la música asturiana en xeneral.

El cd sal a la cai siendo tamién l'estrenu de la casa discos "Three Points Records", que con Stoned Atmosphere van tener la so primer referencia. El discu lleva dalgo más d'un mes grabáu y va tar na cai'l próximu 1 de xunetu. Sobre'l procesu d'ellaboración Fran comentanos que "grabámoslu en casa de Ceeris con un equipu qu'istalemos ellí, asina que d'esta manera tuvimos tola tranquilidá, amás de la llibertá que nos dio la discográfica en too momentu". Nel apartáu de collaboraciones del discu tuvieron miembros de Lego My Ego, Daniel Estilo y los miembros de Escuela de Odio, que collaboren en dellos cantares cosa que se nota nel estilu xeneral del discu.

No que cinca a lo que vamos alcontrar cuando sintamos esti ISSUE 4, Arma X diznos que "hai evolución na cuestión musical porque incluyimos más instrumentos, y amás na voz podemos dicir qu'hai más cantao y menos rapeao ". Falando del estilu que siguen nel discu Fran diz que "ye más intimista , más esperimental, anque de toes maneres esti discu facémoslu cola mesma intención, llibertá y espíritu con que gastabemos nes maquetes anteriores". Amás del discu Fran coméntanos que "tamién tamos grabando un videu musical del cantar Patria sin sol, tema que ya sal nel ISSUE 3 y que volvimos grabar pa esti discu, pero esta vez cola voz del cantante d'Escuela de Odio".

N'Asturies vamos tener varies oportunidaes de ver a Stoned Atmosphere en directo, "vamos tocar el 16 de xunetu en Xixón, y vamos tar tamién nes Fiestes de San Mateo d'Uviéu nel escenariu de la Plaza de la Catedral nuna nueche de Hip-Hop xunta los sevillanos SFDK ".

Pa dir faciéndose una idega de como puede sonar esti discu equí puede sentise un snippet d'esti discu.