Sporting y Uviéu afronten el derbi más emocionante de los años últimos

Los dos equipos enfréntense nun Molinón enllenu pa entrar en puestos de promoción. Alderiques emite un especial sobre'l partíu.

Cuasi 30.000 espectadores van axuntar nel municipal xixonés pa un derbi diferente. Depués de campañes mediocres protagonizaes polos dos equipos, nesta ocasión Sporting y Uviéu acuden al duelu de máxima rivalidá en séptimu y octavu puestu, separtaos en 1 puntu y coles eliminatories pol ascensu a tiru.

Miguel Ángel Ramírez llega al partíu cola baxa d'un de los xugadores más determinantes, el porteru Yáñez, que va tar más d'un mes de baxa, polo que'l cubanu Christian Joel va tener la so oportunidá. Amás, nun va poder contar con Cote, que cumple ciclu, nin con Campuzano, Rosas, Bamba y el mancáu de llarga duración, Zarfino.

Pela so parte, Luis Carrión nun va disponer de Costas al recayer el domingu de la so lesión, nin con Camarasa y Luismi, amás de Tarín, Mario Hernández y Álex Millán, entovía en recuperación. Ye novedá na convocatoria l'últimu fichaxe, l'uruguayu Homenchenko, que llegó esta selmana a Uviéu procedente del Peñarol.

Al meudía, la previa

El derbi va vivise dende'l meudía n'Alderiques. Samuel Gradín presenta un especial sobre esti partíu tan esperáu nel que van participar Pablo R. Guardado, redautor d'Asturies.com, y Miguel Fernandi, comentarista de RPA.

Na semeya, un momentu del derbi de la temporada pasada, que finó con empate 1-1.