Sporting 3 - Jaen 2

Agora que l'ascensu yá nun paez posible, ye cuando'l Sporting gana partíos. Ayeri, contra'l Jaen, l'equipu d'Acebal túvolo fácil de sobra pa congraciase cola afición, que lleva tol añu viendo al equipu ceder puntos en casa. Sicasí, el Xixón acabó pidiendo la hora nun partíu que diba ganando por 3-1.El Jaen, mui feble en defensa y con poca chapeta nel ataque, nun foi rival pa un Sporting que s'adelantaba per mediación de Villa. Tres el gol, los de casa quedaron apaxaraos y dexaron qu'empatare'l Jaen, entrándose nuna fase d'auténtica aburrición hasta que Dani Borreguero remató con gol una xugada de les curioses, cambiando'l balón y con sentíu de la profundidá. Nel segundu tiempu, el Sporting salió decidíu a comer al enemigu, que pa entós yá se diera. Villa tuvo a puntu de forzar la espulsión del porteru del Jaen, que lu tiró al suelu fuera l'área, y entovía tuvo ocasiones de marcar, cosa que llograría Soto tres un bon pase de Dorado. Col 3-1 en marcador, Acebal recompuso l'equipu a la defensiva, cosa rara en viendo que'l Jaen nin s'arrimaba a la portería de Valencia. Lo que pudo ser una goleada d'espatarrar acabó col Sporting atecháu nel área y pidiendo la hora dempués de que'l Jaen marcare'l 3-2 obra del uruguayu Biscaycazu.

Contador Estadistiques