Sporting 1 - Racing 1

Nun partíu en que los dos equipos merecieron ganar y en que el Sporting falló lo que podía fallase y lo que non, cántabros y asturianos firmaron un empate que nun-yos val a nengún de los dos equipos pa postular al ascensu. La cigüa del Sporting en casa sigue viva y paez que'l Molinón va condergar a los de Acebal a echar otru añu en segunda.El Racing, que venía de chupar cinco goles en casa la otra selmana, tuvo la suerte de marcar a los diez minutos d'empezar. El pressing santanderín, xunta los erros defensivos del Sporting, valió pa que los visitantes trabayaren una xugada d'ataque curiosa que Txiki convirtió nel gol cántabru. Poco a poco el Racing foi reculando, mientres el Sporting diba arrimándose más a la puerta de Lemmens. Enantes del descansu, yá hebo oportunidaes, pero lo más curioso ye que, al revés de lo que suel pasar, el Sporting yera'l que mandaba y el Rácing xugaba a la contra. El segundu tiempu cortose la reacción del Xixón, y el Rácing volvió a controlar el partíu hasta qu'Acebal se decidió a tirar de banquillu. La entrada de Soto foi decisiva nesti sentíu, y a los cinco minutos d'entrar, el xugador del Sporting metía'l gol del empate. Col tantu del Sporting, al Santander entró-y l'afoguín por empatar, y el partíu metiose nuna fase lloca con oportunidaes pa los dos equipos. Valencia guardó bien la meta del Sporting, que tuvo la meyor oportunidá pa ganar nun descuentu que se fizo eternu. Soto vio a Lemmens adelantáu y tiró-y una vaselina que tuvo a puntu d'entrar. De la que reculaba p'atayar el balón del Sportinguista, el meta santanderín dio cola cabeza en poste y quedó en suelu del golpe. Nun hubo más, aparte de la segunda mariella que vio Lozano nel últimu minutu y que dexa a Acebal con un xugador menos pal prósimu partíu.