Spirit of the Dance pieslla l'intercélticu avilesín

L'espectáculu de danza "Spirit oh the Dance" ye la última actuación de la VIII edición del Festival Intercélticu d'Avilés.

El Teatru Palacio Valdés d'Avilés va acoyer güei a les 20;:15 hores l'actu de clausura del VIII Festival Intercélticu d'Avilés y l'actuación de "Spirit of the Dance". Los precios en taquilla son de 12, 10 y 6 euros y puen mercáse de forma anticipada na Casa Cultura d'Avilés.

Spirit of the Dance ye un show que ye descendiente directu d'un espectáculu anterior llamáu "Riverdance", qu'usaba les dances tradicionales irlandeses como base pa crear unnúmberu coreográficu. Como evolución d'esti apaeció "Spirit of the Dance", que caltién como fundamentu pasos de dances irlandeses, pero qu'agora incluye bailles basaos en tradiciones d'otres partes del mundu, salsa, ballet clásico y hasta flamenco. "Spirit of the Dance" lleva más d'ocho años actuando y na actualidá hai seyes compañíes xirando per tol mundu con esti montaxe. L'espectáculu tiénenlu vistu más de venticinco millones de persones, y ellí onde va suel collechar un gran ésitu de públicu.

Güei tenemos la posibilidá de ver esti gran espectáculu de música y danza n'Asturies, como pieslle a la meyor edición del Festival Intercélticu d'Avilés nos sos ocho años d'historia.