Soyáu de Mardana, aniciu del debú de "Deua Dubra"

Col nome del llugar onde ensayen, el Soyáu de Mordana, preséntase'l primer discu del grupu de Llaviana "Deua Dubra" que se presentó esti xueves na SXAE. Por cortesía de FonoAstur, Asturies.com ufierta a los sos llectores la oportunidá de ver y descargar el video del primer single d'esti "Soyáu de Mordana".

El responsable de la discográfica del grupu "Fono Astur" Lisardo Lombardía y los miembros del grupu presentaron la mañana del xueves nos locales de la SXAE n'Uviéu'l discu que supón el debú del grupu llavianetu "Deua Dubra". Lisardo Lombardía comentó que rescampla la fuercia d'esti grupu que con dos años de trabayu yá se planten col so primer trabayu discográficu y tamién quixo destacar qu'esti ye un grupu qu'apuesta polos temes cantaos, ocupando la voz ocho de los trece cantares del discu, y poles composiciones propies, cuestión esta última qu'entama a ser yá más habitual ente los grupos folk.

Les y los componentes del grupu declararon tar mui agustu col resultáu final, frutu d'un trabayu conxuntu en que cada miembru aporta'l so granín de sable. El grupu nun cree que'l so estilu tea marcáu per una vertiente pop-folk, o polo menos nun ye la so intención, pero con too y con ello, la banda cuenta con siguir trabayando pa crear un estilu nuevu y propiu.

Falando más concretamente del discu, vemos que si ye verdá, como diz el so productor, l'apueste polos temes cantaos, con lletres de la guitarrista y cantante Lilián Fernández. Nestos cantares topamos lletres d'amor y desamor, proecoloxístes y d'hermanamientu con otros pueblos de cultura céltico. Pa la cuestión instrumental xuega con munches composiciones, anque tamién, como non, tenemos dellos cantares conocíos como la Marcha d'Antón el neñu, la muñeira de Tormaleo, la danza l'osu o el Lieutenant Mcguire.

Un puntu importante d'esti discu ye la nómina de collaboradores que participaron nél. Xente como l'escocés Fred Morrison cola highland bagpipe y la border pipe, el componente de "Kornog" Jimmy McMenemy col bouzouki, Hector Braga col cello, Marie Lecam cola biniou braz, el componente de "Felpeyu" Diego Pangua que tocó la flauta travesera y Eva Tejedor cola curdió diatónicu, la caxa d'alta tensión y pal.leya. Estes aportaciones tienen abonda importancia dientro de munchos cantares que dan un soníu perinteresante a estes pieces.

Pero lo meyor pa descubrir a esta banda ye escuchales, y pa ello güei mesmo hai dos posibilidaes. Dir a veles en directo a Llaviana onde toquen güei sábadu día 25 a les 00:00 hores, o ver el video del primer single qu'ufiertamos a los llectores d'Asturies.com por cortesía de FonoAstur. El video correspuende al segundu corte del discu "Lin", un tema con lletra y música de Lilián Fernández que fala de la historia de Miguel Fernández, un paisanu de Ciañu que tuvo na guerra civil, tema que'l conxuntu aprovecha pa facer un alegatu antibelicista. El video, d'abonda calidá ye obra d'un grupu de collacios del grupu na Facultá de Belles Artes de Granada, y ta dirixíu por Miguel Mesas y producíu por Maricarmen Valverde. Pa velu namás qu'hai que calcar equí.