S.O.U.L. en Xixón

Entama mañana'l festival S.O.U.L. sigles tres de les que s'escuende la frase "sounds of unity and love" una iniciativa que nació nel añu 2003 graciés al interés de dos aficionaos a la música soul que trataron de concentrar nun fin de selmana una visión global del fenómenu de la música afroamericano. El festival llega agora a la so tercer edición, que va celebrase dende mañana 24 de marzu nel escenariu de la discoteca "Oasis" de Xixón, onde van aconceyar dellos de los meyores dj,s mundiales d'esta tendencia.

Los organizadores llamen l'atención sobre'l resurdimientu de la música soul dende va unos años p'acá, y sorrayen que, con llevar nel primer planu de l'actualidá musical dende los 50, la música negro ganó munchu interés na década última graciés al puxu de la música electrónico o'l hip hop, que remocicaron el raigón del soul al traviés de samplers, loops o, cenciellamente, versioneando clásicos o copiando la estética soul. Según espliquen los organizadores d'esti festival S.O.U.L. el fenómenu de recuiperación soulera va más allá de la música y tien tamién un espeyu nel cine, criando amás estilos distintos a partir del soul como'l northern & sixties rare soul, crossover, jazzdance, deep funk, latin, brasil, soundtrax, modern soul, rare grooves, jazz-funk, underground disco o'l soulful house. La entrada pa cauna de les dos nueches del S.O.U.L. va costar 10 euros, contándose pal vienres 25 cola presencia de los DJ británicos Dean Rudland y Gareth Donovan xunta los españoles Alex Subinas y Jose Mardigras, mientres que pa la xornada del sábadu figuren en cartel Christian B. (Noruega) Rob Messer (Inglaterra) y los españoles Eduardo Domingo, Juan Vicente del Castillo y Ismael García.
Más información na web del certame