Sotrondio cuenta con un espaciu nuevu pa esposiciones

Lleva'l nome de 'Espaciu La Plaza' y ta nes dependencies de la plaza d'abastos.

Pensao pa esposiciones de tamaño pequeñu, Espaciu La Plaza inauguróse esti meudía con una coleición de semeyes d'Alberto Fernández Zapico sobre les xornaes gastronómiques de Samartín del Rei Aurelio, que va tar abierta al públicu hasta finales de mes. Ésta ye la primer d'una serie d'esposiciones temporales nesti rincón cultural que potencia la estética de la plaza d'abastos, onde conviven dellos comercios.

"La idea d'habilitar un espaciu cultural nuevu na población respuende al oxetivu d'averar la cultura a la ciudadanía buscando llugares frecuentaos de manera cotidiana pol públicu y d'abondante tránsitu, como pue ser nesti casu'l mercáu d'abastos", destaquen dende'l Conceyu.