Soto Rei celebra la II Nueche en Danza

Forma parte de los Alcuentros de Bandes de Gaites qu'entama la Banda Gaites Soto Rei.

La música tradicional y el deporte xúnense la mano nesta actividá que comienza mañana, cuando va celebrase la II Nueche en Danza, y que va allargase hasta'l sábadu. Un taller de mantenimientu de tambores, a cargu de Juan Somohano, va abrir a les 17 hores l'actividá, que va siguir con una actuación de los neños y neñes que van a gaita y tambor a la Escuela de Música de Mieres (17.30 hores) y otru taller (20 hores), nesti casu de baille tradicional, con Pau Santirso y María Vázquez.

A les 22.30 hores ta programada la Nueche en Danza, que va contar cola participación d'Herbamora y Los Gascones. Tres les sos actuaciones, va haber escenariu llibre hasta bien entrada la madrugada.

IV Carrera de Monte Sierra Llagos

El sábadu va celebrase la cuarta edición de la carrera popular de monte Sierra Llagos, con un percorríu de 14 quilómetros que va permitir a los participantes pasar una bona mañana disfrutando del deporte y del paisaxe de La Ribera. La salida ye a les 11 hores y el preciu de la inscripción, de 8 euros. Tolos participantes son darréu convidaos a una arrozada que va tener llugar en Soto Rei a les 14.30 hores, tres la entrega de premios.

Pela tarde sigue la folixa dende les 17 hores, cuando comienza'l repartu del bollu, amenizáu pola bandina El Koku la Manzana. L'Alcuentru de Bandes de Gaites va principiar a les 19 hores y nesta edición van participar, amás de la formación llocal, Conceyu Siero, Conceyu Grau, Conceyu Llangréu y la gallega Estivada de Calo.

DJ Animation va poner el ramu a la folixa na carpa instalada nel pueblu pa la ocasión dende les 23.30 hores.