Soto presentó'l programa completu de la so Nueche Folk

Mercáu celta, taller de baille, deporte tradicional, conciertu
didácticu van acompañar a la música de los grupos folk de
la X Nueche Folk de Soto d'Ayer, too ello embaxo d'una carpa pergrande pa evitar
problemes climatolóxicos.



El Conceyu d'Ayer acaba de dar anuncia del programa completu que va
poder disfrutase'l próximu trés de setiembre na localidá
ayerana de Soto. La organización apostó otra vuelta por aumentar
y diversificar el conceptu de nueche folk, y iguó un cartel que dende
pela tarde llámanos a averanos hasta'l conceyu d'Ayer.



Ello ye qu'a les 18:hores va abrise'l Mercáu Celta onde van
ufiertase los tradicionales productos d'artesanía y gastronomía
asturiana. De la que se merca dalguna cosa tamién vamos poder disfrutar,
de magar que s'habrá'l mercáu, de xuegos tradicionales, de mano
de l'asociación cultural Retueyu que van ayudar a tol mundu que quiera
disfrutar con ellos. Retueyu tamién van ser los encargaos de dar un
conciertu didácticu sobre les 20:00 hores, nel que van van facer una
amuesa pequeña de les distintes formes que tien d'espresase la
tradición musical asturiana. Y como cume d'esta tarde, y cola
música yá sonando, vamos poder deprender dalgo col taller de
baille sobre les 21:00 hores.



N'acabando les actividaes de la tarde, a eso de les diez de la nueche,
va echar andar la nueche folk en si, que xunta cuatro grupos y un
espetáculu celta. Los primeros en xubise al escenariu van ser
Tarañu, grupu ayerán que de
xuru ta encantáu de tocar en casa y que van facer los temes del so
primer discu Al xeitu de nenyuri. Dempués d'un grupu acabante de llegar
a la escena folk asturiana, van tocar unos auténticos veteranos como son
Llan de Cubel, nuna de les poques ocasiones que vamos tener de velos n'Asturies
anguaño.



A les doce y media la nueche los grupos van dar un parón y vamos
poder ver daqué de teatru con un espectáculu celta. Darréu
d'esti espectáculu teatral va tocar el grupu estrella de la nueche, los
irlandeses Lunasa. Esti grupu
nació en 1997 y hasta agora dió-yos tiempu a sacar cinco discos,
l'últimu The Kinnitty Sessions, colos qu'algamaron ser consideraos una
de les meyores bandes de folk del mundu. La nueche va pesllala'l folk rock de
Skanda, grupu qu'esti añu vivió toa una riestra d'esperiencies,
sacaron discu
-Sangre
d'Ochobre- participaron nel Festival Intercélticu de Lorient,
quedaron finalistes nel premiu al meyor cantar n'Asturianu de la SGAE y ganaron
el premiu al meyor cantar n'asturianu que convocó
Asturies.com.



La organización de la nueche quier facer rescamplar el fechu de
qu'esti añu la lluvia nun va poder estropiar la nueche, yá que va
ponese una carpa bien grande pa, en casu de que llueva, abellugar a toles
persones que quieren disfrutar de tolo qu'ufierta esta completa
Nueche Folk de Soto
d'Ayer.