Soto d’Ayer celebra güei la so nueche folk

El prau y la carpa yá tán preparaos en Soto d'Ayer p'acoyer güei trés de setiembre una cita imprescindible pa los aficionaos a la música folk. Dende les 18:00 hores va haber actividaes y mercáu tradicional pa que lo remate too pela nueche'l folk a partir de 22:00 hores.

La organización nun quixo dexar nengún detalle ensin amarrar pa que too salga perfecto na edición d'anguaño del nueche folk de Soto d'Ayer. Ello ye que yá ta istalada una enorme carpa nel prau del conciertu pa que la lluvi nun mueye a tolos que quieran averase hasta'l conceyu d'Ayer. Amás, y pa que la vuelta de los de la redolada seya lo más segura posible, va haber un serviciu de autobuses de baldre dende les cinco la mañana hasta les 7 ente Soto, Mieres y Flechosa, que va dir parando pelos pueblos.

No que cinca la cuestión de lo que vamos poder ver ellí, topamos un programa bien interesante y variáu, Ello ye qu'a les 18:00 hores va abrise'l Mercáu Celta onde van ufiertase los tradicionales productos d'artesanía y gastronomía asturiana. De la que se merca dalguna cosa tamién vamos poder disfrutar, de magar que s'habrá'l mercáu, de xuegos tradicionales, de mano de l'asociación cultural Retueyu que va ayudar a tol mundu que quiera disfrutar con ellos. Retueyu tamién van ser los encargaos de dar un conciertu didácticu sobre les 20:00 hores, nel que van van facer una amuesa pequeña de les distintes formes que tien d'espresase la tradición musical asturiana. Y como cume d'esta tarde, y cola música yá sonando, vamos poder deprender dalgo col taller de baille sobre les 21:00 hores.

N'acabando les actividaes de la tarde, a eso de les diez de la nueche, va echar andar la nueche folk en si, que xunta cuatro grupos y un espetáculu celta. Los grupos que van actuar son cuatro, y van tocar pel orde qu'equí los presentamos. Los primeros en xubise al escenariu van ser Tarañu, grupu ayerán que de xuru ta encantáu de tocar en casa y que van facer los temes del so primer discu Al xeitu de nenyuri. Dempués d'un grupu acabante de llegar a la escena folk asturiana, van tocar unos auténticos veteranos como son Llan de Cubel, nuna de les poques ocasiones que vamos tener de velos n'Asturies anguaño.

A les doce y media la nueche los grupos van dar un parón y vamos poder ver daqué de teatru con un espectáculu celta, obra del grupu de Poo de Llanes "El ñeru los coríos". Darréu d'esti espectáculu teatral, va tocar el grupu estrella de la nueche, los irlandeses Lunasa. Esti grupu nació en 1997 y hasta agora dió-yos tiempu a sacar cinco discos, l'últimu The Kinnitty Sessions, colos qu'algamaron ser consideraos una de les meyores bandes de folk del mundu. La nueche va pesllala'l folk rock de Skanda, grupu qu'esti añu vivió toa una riestra d'esperiencies, sacaron discu -Sangre d'Ochobre- participaron nel Festival Intercélticu de Lorient, quedaron finalistes nel premiu al meyor cantar n'Asturianu de la SGAE y ganaron el premiu al meyor cantar n'asturianu que convocó Asturies.com.