Sones y Cantares de la Navidá

Andecha Folclor d'Uviéu añade'l tercer discu a la so serie de "sones y cantares". Un discu mui adecuáu pa estes feches, y que tien como principal oxetivu'l de tresmitir una cultura viva, una forma tradicional d'entender la vida, nesti casu la navidá. L'Andecha Folclor d'Uviéu son un grupu formáu en 1989 de la xuntanza de dos grupos, Riscar y Urogallos, que cuenta con un gran fondu documental y sonoru, amas de desarrollar un llabor d'investigación, del que ye frutu esti "El ciclu per Navidá: el son nos Aguilandos, Villancicos y Ramos III" editáu por Fonoastur.Nesti trabayu hai temes procedentes del Cancioneru Torner y del trabayu d'investigación, amas tenemos nelli la oportunidá d'escuchar primero cortes breves de los informantes qu'apurrieron los cantares pa que l'Andecha nos faiga darréu la so versión. Nesos cantares acompañen músicos como Dolfu Rodríguez al vigulín y bombu, Octavio Trapiella cola cordión de botonera, Canor Fernández cola gaita rabil, castañueles, fierru y tarrañueles...etc.Un trabayu necesariu y d'agradecer son el que realicen grupos como estos que demuestren lo muncho que queda por facer nel tarrén de la recuperación musical asturiana.