"Son plantegamientos serios", considera González Riaño

|

El vicepresidente de l'Academia de la Llingua Asturiana, Xosé Antón González Riaño, valoró de forma positiva'l documentu anunciáu pol precandidatu a rector Santiago García Granda. "Ayudarán a tener una mayor percepción de 'universidá asturiana' de la institución", asegura.

A la espera de conocer la opinión nesti asuntu del restu de precandidatos, "pa tener un meyor criterio", les propuestes de García Granda resultaron satisfactories pa González Riaño, sobre manera nos aspeutos que se refieren a una mayor entidá académica pal asturianu, la normalización llingüística na institución y l'usu del idioma na imaxe corporativa de la Universidá d'Uviéu. "Son plantegamientos serios y fáense como nunca se fixeron, como programa eleutoral", apunta.

 "Nel tema de los estudios de Filosofía y Lletres, la creación d'una mención sería un pasu alantre. Ameyoraría la so estructura académica y el so valir, asemeyándolo asina a una propia especialidá", asegura. Sicasí, l'académicu valora más el fechu de "que se fale de la posibilidá d'afondar nuna entidá académica mayor" nel casu de qu'hubiere un consensu máximu de la comunidá universitaria.

La normalización

"Paezme mui relevante la creación d'una Oficina de Normalización Llingüística que solucione los problemes y trabaye na dignificación del asturianu na institución", continúa González Riaño, que pon l'exemplu de Galicia, onde esisten esti tipu de servicios nes universidaes. Otra propuesta "mui interesante" ye l'emplegu del idioma na imaxe corporativa, lo que'l profesor universitariu entiende como l'usu conxuntu de les denominaciones 'Universidá d'Uviéu' y 'Universidad de Oviedo'.

"Estes midíes ayudarán a tener una mayor percepción de 'universidá asturiana' de la institución, polo que les valoro mui positivamente, a la espera de conocer les propuestes del restu de candidaos", afirma González Riaño.

Contador Estadistiques