Soliciten a Asturies que presione a Colombia pa qu’investigue sobre la muerte de 2.199 persones

|

Edinson Cuéllar Oliveros, abogáu colombianu del Colectivo Sociojurídico Orlando Fals Borda, ta estos díes n’Asturies pa pidir presiones a Colombia pa qu’investigue sobre la muerte de 2.199 persones. Cuéllar aconceyóse col Bloque y IX-LV.
 
L’abogáu, que ta de xira per Europa pa ganar apoyos na so causa, tamién celebró una reunión colos responsables de l’Axencia Asturiana de Cooperación pero, por el contrario, nun pudo aconceyase nin col PSOE nin col PP por problemes d’axenda d’estes formaciones, según esplicó’l propiu Cuéllar. La so intención ye qu’Asturies y otros gobiernos europeos presionen a Colombia pa qu’investiguen 2.199 casos de cuerpos ensin identificar que l’Exércitu presentó como supuestos guerrilleros muertos en combate nel departamentu de Meta, nel centru del país.
 
El Colectivo Sociojurídicu Orlando Fals Borda tien pruebes de que “al menos cinco casos son execuciones estraxudiciales de campesinos”, afirma Cuéllar. Hai diez díes visitaron la zona representantes de l’Axencia Asturiana de Cooperación acompañaos pola presidenta de la Comisión de Derechos Humanos del Gobierno Vascu, responsables de la organización Soldepaz, y el coordinador de los programas d’ayuda al refuxáu colombianu, Javier Orozco. Toos ellos mantuvieron una reunión cola Fiscalía colombiana, que treslladó a los cooperantes la imposibilidá d’investigar estos casos por falta de recursos. Por ello, Cuéllar pide a los gobiernos y instituciones europees qu’ofrezan l’ayuda necesaria pa la investigación d’estes 2.199 muertes –10.128 si sumamos les de tol país–, “yá que la falta de recursos ye la escusa qu’argumenten”. “Si hai plata pa la guerra, tamién tien qu’habela pa investigar violaciones de derechos humanos”, añadió.
 
Roberto Colunga, parlamentariu del Bloque por Asturies, y Rafael Palacios, candidatu de la coalición Bloque por Asturies-Unidá Nacionalista Asturiana a la Xunta Xeneral, foron les persones de la formación nacionalista que recibieron al abogáu colombianu. Tanto Palacios como Colunga ufrieron el so sofitu a la reivindicación de Cuéllar y se comprometieron a siguir esixendo al Gobiernu dende les instituciones el mantenimiento de la solidaridá con Colombia y de los programas d’acoyida temporal de refuxaos colombianos.

Contador Estadistiques