“Soi de los que cree que’l votu de la oficialidá nun depende del modelu; agora toca la idea xeneral”, asegura Barbón

Daniel Ripa, voceru de Podemos, entainó a Adrián Barbón a entamar cola reforma del Estatutu pa cumplir colos plazos y que llegue esta llexislatura a Madrid. “Nun tengo nada claro qu’haya 27 diputaos”, respondió-y el presidente, qu’asegura que’l modelu d’oficialidá deberá decidilo la próxima Xunta Xeneral.

“Tendremos que saber qué condiciones pon pa votar –en referencia al diputáu de Foro, Adrián Pumares– pa ver si les aceptamos los demás. Diz munches vegaes ‘fáleme del modelu’, pero ye a la inversa: fáleme vusté de cuáles son los requisitos que quier pa qu’haya oficialidá”, señaló’l socialista. “Nós tendríamos una actitú mui dialogante”, avanzó darréu, pa siguir apuntando que “yo soi de los cree que’l votu de la oficialidá nun depende del modelu; agora toca la idea xeneral, pero’l modelu tien que ser la próxima Xunta Xeneral, porque toi convencíu de qu’equí hai grupos que van votar en contra de la oficialidá, la señora Fernández enantes dicía ‘yo’, Ciudadanos, y llueu van querer negociar el modelu”, lo que pal socialista ye “bona señal” al aumentar el consensu.

“Pero necesitamos 27 votos, y nun hai reforma del Estatutu posible y, poro, oficialidá, si nun hai 27 votos nesta Cámara, y a día de güei nun los hai. Y por muncho que fixen un calendariu, qué más da, sin nun los hai”, insistió al tiempu que pidió prudencia. “Esti alderique debemos facelo de manera razonable”, añadió’l socialista, que nun dio importancia a los plazos apuraos p’aprobar la posible reforma estatutaria en Madrid, siendo optimista amás de cara a les Estatales del 2023.

“Tamos nel límite”

El secretariu xeneral de Podemos, qu’emplegó na so intervención l’asturianu pa falar de la reforma estatutaria y el gallego-asturiano pa facelo de sanidá, rescampló sobre lo primero que “pue asitianos como la nacionalidá histórica que somos, pue aumentar el nuesu autogobiernu o financiación autonómica, y blindar derechos sociales”, tresllando a Barbón “el sofitu del mio grupu parllamentariu pa que llegue a bon puertu”. “Tamos nel límite de tiempu pa que se pueda aprobar esta llexislatura”, recordó Ripa, qu’insistió col calendariu “únicu posible” fechu xunto con Izquierda Xunida, que marca la primer selmana d’avientu como fecha pa qu’entre na Cámara l’alcuerdu “pa que la so aprobación se produza enantes que termine xunu del 2022. Si se siguen marafundiando los pasos, vamos hacia un escenariu d’aprobación n’Asturies y non en Madrid”.

“Los plazos nun pueden tirar embaxo tantes esperances. Urxe tramitar la reforma”, insistió’l diputáu.

Imaxe recortada a partir d'una semeya fecha por Armando Álvarez.