SODECO ayudó en 230 microproyectos con 39,8 millones d’euros invertíos

SODECO ayudó en 230 microproyectos con 39,8 millones d'euros invertíos

La Sociedá de Desarrollu de les Comarques Mineres (SODECO) ta acabante de dar anuncia del resultáu de los premios que cada añu da la entidá a los proyectos empresariales más interesantes qu'invierten nes comarques mineres.

Nesta convocatoria los ganadores son: Quesería Artesana La Figar que produz quesu Afuega'l Pitu; l'hotel rural y muséu Ca'l Xabú; y la empresa Cultivo Algas Marinas. Los premios tan dotaos con 18.000, 12.000 y 6.000 euros destinaos íntegramente a la inversión nos proyectos premiaos. Ente les valoraciones que tien el xuráu de los premios destaquen la viabilidá comercial y económica asina como la creación d'empleu y el desarrollu endóxenu de la zona.

Esta ye ya la décima convocatoria de los premios a los que presentáronse 23 proyectos empresariales con una inversión global de 1,8 millones d'euros y la creación de 83 emplegos.

SODECO ye´l principal instrumentu de promoción d'Hunosa xunta la sociedá de capital riesgu qu'anguaño preside l'expresidente de la compañía minera Sadim. La sociedá SODECO entamó a furralar nel añu 1988 y ta constituida al 50% pol Principáu d'Asturies y pola propia Hunosa.

Dende l'entamu d'esta iniciativa SODECO ayudó a entamar 230 microproyectos empresariales con una inversión pública de 39,8 millones d'euros y una inversión total penriba los 240 millones d'euros. Estes iniciatives empresariales ficieron posible crear alrodiu 2000 puestos de trabayu. SODECO tamién ufierta la posibilidá de participar hasta del 45% del capital de les nueves empreses y caltener la presencia nel accionariáu hasta nun periodu de diez años.