Sobreseida la denuncia a ún de los manifestantes na fuelga pola enseñanza

Un grupu de militantes y simpatizantes de Xunta Moza teníen pendientes denuncies nes que se-yos pidíen multes por importe d'ente 300 y 6.000 euros por participar na manifestación que se celebró acompañando a la fuelga d'enseñanza del 15 de payares del 2004

Agora, ún de los denunciaos naquella xornada ta acabante de recibir carta na que se-y informa del sobreseimientu de la denuncia y el consiguiente archivu del espediente. Según fontes de los servicios llegales de la Xunta Pola Defensa de la Llingua, ello ye una bona noticia que, a falta de conocer la resolución de los otros espedientes, indica que les denuncies carecíen de fundamentu en que tenese. Les denuncies falaben de "ocupación de la vía pública" y poníen a los acusaos como "promotores de la manifestación" cargu que nun se pudo comprobar y que llevó al sobreseimientu de les denuncies.

El sobreseimientu d'esta denuncia fai camentar a los abogaos de la xunta que tamién ye probable que vayan archivase les otres trés denuncies que se formularen esi día. Sicasí, sigue abiertu'l procesu a los 8 militantes de la Xunta Pola Defensa de la Llingua que se manifestaron en Cuadonga al pasu del presidente Areces con motivu de la celebración del Día d'Asturies nuna de les acciones de la "pita" de la Xunta y a los que se-yos piden 300 euros de multa