Sobresaliente pa la primer tesina que se llee n'asturianu na facultá d'Historia d'Uviéu

"El discursu de la periferia. Corrientes federalistes y autonomistes na Asturies decimonónica (1808-98)" ye'l títulu de la tesina doctoral de Faustino Zapico (Mieres 1971). La tesina, que'l tribunal, formáu pola directora del trabayu Carmen García y los profesores José Girón y Francisco Erice calificó con sobresaliente, aborda la xénesis de los discursos políticos autonomistes na Asturies del sieglu XIX

Según esplicó'l doctorandu, l'articulación del discursu autonomista na Asturies del XIX articúlase alredor de dos grandes polos de pensamientu políticu, el carlista y el republicanu federal, pero si lo mesmo que n'otros llugares del estáu, mientres el republicanismu federal yá parte de mano con un discursu federalista, el carlismu, al revés de lo que pasa n'Euskadi y otros territorios, tarda en facese con un discursu políticu claramente autonomista asturianu hasta prácticamente'l terciu final de la centuria.

Faustino Zapico esplicó na defensa de la tesina qu'esta fala esclusivamente de la evolución de los discursos políticos y de la reivindicación autonomista, pero sorrayó como nel so estudiu pudo constatar qu'autonomismu políticu y asturianismu cultural son fenómenos distintos na Asturies decimonónica y como les grandes figures del asturianismu cultural son xente nos más de los casos ayenos a plantegamientos autonomistes o federalistes y como, al revés, los que desarrollen les tesis polítiques del federalismu y l'autonomismu son xente refractario a la recuperación de les señes identitaries como la llingua o la cultura tradicional.

El tribunal emponderó'l trabayu de Zapico, pal que la directora de la tesina, Carmen García, pidió la máxima calificación a los sos compañeros, y sorrayó la relevancia de que seya la primer tesina n'asturianu, apuntando que "anque ye bien sabida la mi opinión sobre'l tema de la llingua, cuando Faustino m'ofreció que-y llevare la tesis, acepté con munchu gustu"

D'otra manera, los profesores José Girón y Francisco Erice reconocieron lo novedoso del tema tratáu y del enfoque, que calificaron de "mui coherente" pero cuestionaron tanto dellos aspectos de forma como del fondu. Francisco Erice señaló la esistencia nel trabayu de "apriorismos" que-y abultaron cuestionables, como'l de la esistencia d'una pretendida "etnicidá astur" que'lprofesor universitariu atalantó "más o menos esplicitada" na tesina, pero reconoció qu'estos mesmos conceptos y l'enfoque xeneral de la historia asturiana del que se derivaben yeren l'alma y el motor de la mesma investigación, que nun dexó d'emponderar.

Faustino Zapico llamentó la dificultá d'accesu a munches de les fontes documentales precises pa enanchar la investigación, sobremanera l'accesu a munchos de los pocos periódicos que se conserven, lo mesmo que la poca representatividá de gran parte del corpus documental presente n'Asturies qu'obliga a desplazase a Madrid a consultar archivos. La tesina presentada esta mañana ye l'adelantu d'una futura tesis, tamién n'asturianu, na que l'investigador va desarrollar la evolución del discursu políticu del carlismu asturianu.