Skontra yá tien el so nuevu discu

Anque tovía nun ta na cai, yá ta grabáu, y va presentase d'equí a poco col nome de "Semeya de la rabia" el primer discu de "Skontra".

"Skontra" ye una banda acabante d'arroxar nel fornu del rock punk-rock asturiano. Pudimos conocelos, amás de por un cientu conciertos, pola grabación que fexeron nel discu "Rock'n'llingua" xunta otres bandes como "Oi! N'ast! o "La Tarrancha". Los directos espeyaben a un grupu cola esperiencia y la solidez necesaries como pa metese a grabar un discu llargu, ello aparte de la maqueta que grabaren nel 2002 y de la so participación en dellos compilatorios a los llargo d'estos años. D'esta manera "Skontra" decidió autoeditar el discu, y púnxose a grabar esti "Semeya de la rabia" nos estudios "Tutu" de Corvera cola dirección del productor Sergio Rodríguez y de Paco Martínez. La grabación fízose ente últimos de xineru y primeros de febreru y el resultáu son 10 cantares que valen de recorríu pelos distintos estilos que practica'l grupu. El viaxe cubre dende'l punk hasta'l reggae, meciendo lletres n'asturianu y en castellanu.

Esti discu va tar dedicáu a Viktor "K", baxista del grupu "Insultosalgobierno", que morrió n'accidente de tráficu nes feches nes que "Skontra" taba grabando'l so discu. Pa sentir un pequeño adelantu del discu puede dise a la web del grupu y descargar "Gaiteru Rudeboy", ún de los temes que grabaron nesti "Semeya de la Rabia" que vamos poder sentir enteru d'equía poco.