Skontra ofrez dos temes d’adelantu del so próximu discu

|

El grupu punk-folk Skontra ta a piques d’asoleyar el so tercer trabayu “Mazcando miseries”. Mientres nun sal, la banda ufre dos cantares d’adelantu n’Internet: “En mi cárcel” y “Santana”.

Grabáu nos Tutu Estudios de Corvera baxo la producción de Sergio Rodríguez, “Mazcando miseries” va ser el tercer discu d’estudiu de Skontra, banda referencial del punk-folk fechu n’Asturies.

El trabayu, formáu por diez cantares – a los que se sumen una intro y un outro-, da un pasu hacia los oríxenes musicales del grupu. Mayor presencia d’influencies folk y un soníu más punk-rock, con una migaya de ska, reggae y hardcore; ye colo que se presenta Skontra nesta nueva entrega.

El discu, autoeditáu y con distribución d’Algamar Producciones y Xunca Records, va salir a la venta el próximu mes d’avientu. Sicasí, Skontra yá ofrez dos cantares d’adelantu na so web y myspace: “Santana” y “En mi cárcel”; dos temes onde’l son entemécese con unes lletres de calter social y reivindicativu.

“Miserable Tour”
Nel mes d’avientu tamién va dar arranque “Miserable Tour”, una nueva xira del grupu que los va llevar a tocar per Alemania y Holanda. Los 9 años de trayectoria de la banda van sonar enriba les tables, col repasu a temes de los sos anteriores trabayos “Semeya de la rabia” (2006) y “Cantares pa dempués d’una guerra” (2008), xunto a los d’esti tercer discu.
 

Contador Estadistiques