Skanda gana'l premiu d'Asturies.com al Meyor Cantar n'Asturianu 2004

El tema "Sangre d'ochobre" del grupu de la cuenca caudal Skanda foi'l cantar que más votos recibió na última fase del premiu al Meyor Cantar n'Asturianu qu'entamó esti diariu.

Como yá saben los más de los nuestros llectores, a la fase final del Premiu llegaron trés temes d'estilos bien estremaos. El folk acústicu de "Tarañu" col tema "Nun mos dexen", el cantar tranquilo y fonderu de Pedru Pereira con "Xedré", y los que finalmente saldríen ganadores "Skanda" con "Sangre d'ochobre" cantar del meyor folk-rock de los mierenses. El resultáu final de les votaciones espeya que "Skanda" recibió de forma clara la mayoría del sofitu de los nuesos llectores, 969 votos (54% del total de votos) son la preba d'ello, en segundu llugar quedó "Tarañu" con 558 votos (31% del total de votos) que nun fueron suficientes pa ganar, anque si son una amuesa del que'l grupu gusta y tien muncho fans. Nel tercer puestu del podiu ta Pedru Pereira, el cantautor de Cangas del Narcea recibió 250 votos (14% del total de votos), un bon resultáu pa un artista que ta recién presentáu nel panorama musical asturianu col so primer discu.

"Sangre d'ochobre" ye un tema del últimu discu d'esta banda al que-y da títulu'l cantar. Tien lletra de Pepe Fueyo, guitarrista del grupu, y cuenta les andances de Xuan un miembru d'un batallón qu'esistió na guerra civil española, nel tema collabora tamién la voz d'Oti Méndez.

Dende Asturies.com queremos da-y, como non, la norabona a "Skanda" pol premiu, pero tamién al restu de grupos que recibieron, en mayor o menor midida, l'apoyu de los nuesos llectores. Tamién dar les gracies por supuestu a los nuesos llectores colos qu'ensin la so participación diba sedría imposible llevar alantre el concursu, de la mesma manera agradecer a los nuesos patrocinadores "L'Aguañaz" y "Fonoastur" la so collaboración nesti concursu que busca, nuna competición sana, contribuyir al espardimientu de la producción musical asturiana.