Skama la Rede y Ochobre repiten xuntos nel Kuivi

La tarde-nueche dedicada al rock n'asturianu nel festival del vieyu HUCA complétase con una sesión de DJ Avante'l Pueblu.

Na mesma fecha, 1 de setiembre, Skama la Rede y Ochobre, tornen a xuntase nel Kuivi nuna xornada cola llingua asturiana como protagonista. Si aquel día, nel que tamién participó Dixebra, ye recordáu polos presentes, les dos formaciones prometen repetir el bon ambiente d'aquella ocasión.

La cita ye mañana dende les 21 hores –apertura a les 20.30 hores– con Ochobre, pa siguir a les 22.45 hores con Skama la Rede. Va animar la folixa hasta'l pieslle, marcáu pa les 2 hores, el DJ Avante'l Pueblu con una sesión.

Anque la previsión meteorolóxica apunta que pue cayer daqué d'agua mientres los conciertos, la organización dispón nesta edición de techu pa poder disfrutar de les actuaciones. La entrada al recintu ye de baldre.

Na semeya, un momentu de l'actuación de Skama la Rede l'añu pasáu nel Kuivi.