Skama la Rede, Skontra, Adizión Etílika y Taranus completen el cartel del conciertu de Darréu

El X ‘Conciertu Asturies nun Escaez’ yá conoz el so cartel definitivu. El sábadu 22 d’ochobre van actuar en Sama Skama la Rede, Skontra, Adizión Etílika y Taranus, que se sumen a los primeros confirmaos: Escuela de Odio y IRA.
 
Esta actividá, encuadrada nel Día de la Mocedá Revolucionario (DMR) qu’entama Darréu los díes 21 y 22 d’ochobre en Llangréu, va tener nesta ocasión cien por cien sabor asturianu cola presencia de seis grupos del país de dellos estilos: dende’l hardcore d’Escuela de Odio al punk de Skontra, pasando pol folk-metal de Taranus. D’esta forma, la organización quier dar protagonismu a la música asturiana nesti conciertu especial por ser el décimu del ciclu entamáu nel añu 2000 en Noreña por Andecha Mocedá, cita na que participaron bandes históriques como Avientu, Intolerance, OI! N’Ast, N’Arba y los vascos Betagarri y Etsaiak.
 
Tres los conciertos, que van principiar a les 20 hores nel colexu públicu José Bernardo, la folixa va continuar con una sesión de música reggae a cargu de Xose N’Ast y Ozono. Na escuela, la organización va instalar una barra con bébora y comida a precios populares, a lo qu’hai que sumar una zona pa que les delegaciones internacionales que participen nel DMR coloquen puestos de material.
 
Les entraes tienen un preciu de 10 euros, en venta anticipada, y de 12, na puerta, dos euros más cara pero qu’inclúi de baldre un CD recopilatoriu del DMR. Los puntos de venta onde van tar disponibles les entraes nos díes próximos son los siguientes: Sidrería Castaño (Riañu); Sidrería Alonso, L'Espumeru, El Cuelebre Negro y Bar B12 (La Felguera); Cervecería La Industria, Imprenta La Fueya y Cervecería Sheffield (Sama); La Folixa (Ciañu); C.S. La Semiente y Tom Malory (L’Entregu); Rolling (Sotrondio); Cervecería Bulldog (Llaviana); Cafe-Bar La Habana (Mieres); El Diañu (La Pola Siero); Llar d'Andecha y Los Riegos (Noreña); L'Ayalga, Xarana y El Baruku (Xixón); Bar Queen Maeve (Avilés); Cervecería Deva, L'Esperteyu y la Caja Negra (Uviéu); y La Bodega (Villaviciosa).