Sindicalismu y protocolu de Kyoto, a debate n’Avilés

La Fundación Juan Muñiz Zapico, venceyada al sindicatu CCOO organiza esta tarde n'Avilés un interesante debate que baxo'l títulu "Sindicalismu énte Kyoto" va sentar nuna mesa redonda a especialistes en cuestiones rellacionaes coles emisiones contaminantes industriales a l'atmósfera con representantes de pesu d'esta central sindical nun debate nel que van vese los posicionamientos y idees que dende l'ámbitu sindical y l'ecoloxista esisten sobre l'oxetivu de mengua de les emisiones de CO2 y el cambiu climáticu. Asina, ente los ponentes van tar José Santamarta, director de la edición española de la prestixosa revista mediuambiental WorldWatch y Paco Ramos, representante d'Ecoloxistes n'Acción d'Asturies, mientres que pela otra banda va tar el secretariu de CCOO d'Asturies Antonio Pino y Francisco Prado Alberdi, presidente de la Fundación Juan Muñiz Zapico. L'actu, con entrada llibre, va ser a les 7 de la tarde nel Centru Municipal d'Arte y Esposiciones d'Avilés, asitiáu na Cai Llano Ponte.