Silvia Quesada debuta en solitariu col discu ‘La pena abierta’

|

La cantante Silvia Quesada da un pasu más na so carrera cola espublización del so primer discu en solitariu. Ésti lleva’l nome de ‘La pena abierta’ y inclúi diez cantares de temática sentimental que baillen ente la música pop y la d’autor.

Editáu baxo l’amparu del sellu Algamar Producciones, Alfredo González y Sergio Rodríguez encargáronse de la producción d’esti álbum que cuenta con lletres compuestes por xente de la talla de Berta Piñán, Boni Pérez (Los Locos), Javier Vallina (Bueno), Pablo Texón, Laura Fernández o’l propiu González. Estos cantares, de temática sentimental “vistes dende'l prisma de la decepción o la derrota (‘La pena abierta’, vuelta de tuerca al mitu de Penélope y Ulises), la resignación dignificada (‘Antes d'empezar’, lletra de Laura Fernández) o la resignación, cenciellamente, aceptada y hasta esperanzada (‘La vida que te falta’)”, vienen acompañaes por una instrumentación austera. Asina, a la voz de Quesada acompáñenla la guitarra acústica y la viola de Rubén Bada, el baxu y les programaciones de Sergio Rodríguez y el pianu d'Alfredo.

La música de los temes ye obra, na so mayor parte de González, sacantes dos firmaes por Vallina, que s’estrena componiendo en llingua asturiana nesti discu: ‘Son demasiaes les coses qu'hai qu'aprender’ y ‘Les palabres’. Ente les collaboraciones musicales tamién s’atopen les d’Elías García y los hermanos Tejedor, colos que Quesada permanez de xira como vocalista cubriendo’l güecu dexáu por Eva Tejedor. Enantes, la so trayeutoria desendolcóse coles formaciones Muyeres, Blima –col que grabó’l discu debú de la formación, ‘Entamu’– y Los Gatos del Fornu –participó nel segundu álbum, ‘Na cai’–.

Presentación en direuto en Mieres

El 17 de xineru va ser la primer oportunidá de sentir en direuto los cantares de ‘La pena abierta’. Quesada va presentar esti discu en Mieres, na Casa Cultura Teodoro Cuesta, a partir de les 20 hores nun conciertu con entrada llibre previa retirada d’invitación en Música Miler, nel Café Habana o na propia casa cultura. La xente del occidente va poder disfrutar de la perguapa voz de Silvia’l 23 d’esti mesmu mes na Casa Cultura d’A Veiga, tamién a les 20 hores y con entrada llibre hasta completar aforu. Como adelantu, Asturies.com ufre a los nuesos llectores la posibilidá d'escuchar el corte númberu 2 del discu, que da nome al álbum.

 

Contador Estadistiques