Sigue’l Festival de Cine asturiano en Madrid

El Festival de Cine Asturiano en Madrid qu'organiza Xaviel Vilareyo va facer los prósimos díes 3, 16 y 17 de xunu un bon garapiellu d'actividaes y proyecciones que van tener llugar nel Salón d'Actos de la Biblioteca de Madrid "Joaquín Leguina".


Asina, el vienres 3 de xunu del 2005 a les 18 hores va celebrase nel Salón d'Actos el I Centenariu del Cine Asturiano con una presentación y conferencia, mesa redonda y coloquiu onde se presentará y proyectará la película muda asturiana de 1928 "Mieres del Camín" de Juan Díaz Quesada amás de la película documental "Oviedo, Principado de Asturias" de 1942.


El xueves día 16 de xunu a les 18 hores, reentamará'l Festival y proyectaráse la "sección ofiial" a concursu de los curtiumetraxes finalistes seleccionaos pal I Concursu de Curtiumetraxes Asturianos, onde un xuráu popular va votar al meyor actor, actriz, guion y director del Festival. Los curtiumetraxes 7337 y Lencería de ocasión de Sergio G. Sánchez y Teresa Marcos respectivamente yá recibieren los premios al meyor curtiu n'asturianu y en castellanu.

El vienres día 17 de xunu a les 18 hores entama la Gala de Clausura cola entrega ofical de premios, homenaxes y proyección de curtios ganadores. Un atractivu especial pa esta sesión va ser la proyección del documental "El gnomo de la catedral" de Justo de la Cueva, 1942, película recién remasterizada. La entrada a les trés sesiones ye dafechu gratuíta pa tol públicu cinéfilu.

La Biblioteca Regional de Madrid "Joaquín Leguina" ta na cai Ramírez de Prado. Allugada nel barriu de Delicias, enfrente del Muséu del Ferrocarril, la Biblioteca Regional de Madrid ye la segunda más grande de la capital tres de la Nacional, allugaando'l depósitu llegal de llibros editaos na Comunidá y l'Archivu de Madrid, amás de ser dende la so inauguración un importante centru cultural madrilanu. L'edificiu que l'atecha ye'l d'una antigua fábrica de cerveza d'últimos del XIX d'estilo neomudejar reconvertida pa usos culturales nuna adaptación modélica.