Sigue'l debate sobre la TV asturiana

Dempués de dase a conocer la otra selmana la composición del Conseyu d'Alministración de la TV asturiana, el debate sobre l'ente autonómicu de comunicación sigue en tolos frentes. Asina, el PP plantega güei na Xunta Xeneral del Principáu delles entrugues sobre la canal de TV asturiana, que diz que va "tapar" la señal d'otres canales yá esistentes, casu de Televisión Local de Xixón. Los conservadores aseguren tamién que la TV va tener un coste superior a los 6 millones d'euros que s'anunciaron.

Xunta esti debate, colectivos asturianistes de toa triba asoleyaron esta selmana comunicaos nos qu'opinen sobre la presencia del asturianu na futura canal autonómica. La presencia del asturianu nel debate sobre los conteníos de la TV ye entovía una incógnita, y colectivos como la Xunta Pola Defensa de la Llingua, Periodistes pol Asturianu o Izquierda Asturiana denunciaron esta carencia a lo llargo de la selmana.

Periodistes pol Asturianu asoleyó esta selmana un comunicáu nel que recuerda que'l pautu de gobiernu ente PSOE y IX-BPA falaba de crear un ente públicu "comprometíu cola realidá cultural y llingüística d'Asturies" y camienten qu'ello namás pue dase al traviés d'una TV na que la normalización del asturianu "sía ún de los sos oxetivos principales, tal como lleven faciendo dende va años el restu de les televisiones y radios d'autonomíes con llingua propia". Por ello, la plataforma de profesionales de la comunicación favorablesa la normalización del asturianu piden que s'empincipie a trabayar "Yá" nuna política llingüística específica pal mediu. Periodistes pol Asturianu diz que l'asturianu ha tener presencia en deportes, informativos y programación infantil, torgando la creación de "rincones del bable" que "namás valen pa salvar les apariencies".

Pela so parte, la Xunta Pola Defensa de la Llingua Asturiana pronuncióse en términos bien asemeyaos. Pa l'asociación cívica ye importante alcordase de que "foron razones llingüístiques les que llevaron a la creación de les primeres canales de TV en Galicia, País Vascu y Cataluña" y llama al cumplimientu de la Carta Europea de Llingües Minorizaes, que fala de cada comunidá llingüística tien derechu a una canal de TV na llingua propia. La Xunta, que pañare va tiempu 20.000 firmes al favor de la TV n'asturianu, refuga "la puesta en marcha d'un ente de comunicación que nun va tener l'asturianu por llingua vehicular y que nun va tener nin siquiera una política llingüística definida". La Xunta Pola Defensa remata'l so durísimu comunicáu afirmando que nes actuales condiciones "namás ve na TV un instrumentu de propaganda al serviciu del gobiernu de turnu".

Nesa mesma valoración política afonda Izquierda Asturiana. El partíu políticu nacionalista amestóse a la petición d'una normalización del asturianu na canal autonómica, qu'entiende que "ha dir progresivamente adaptando les sos emisiones hasta convertise nun elementu clave na normalización de la llingua asturiana, ello ye, emitiendo la mayoría de la so programación n'asturiano" Otramiente, IAS punxo en dulda el valir profesional de los representantes de los grupos políticos nel Conseyu d'Alministración y afirmó que son "comisarios puestos polos partíos" y non "profesionales de la comunicación" una crítica que tamién fizo va tiempu l'Asociación de la Prensa d'Asturies, qu'atalantaba qu'un Conseyu escoyíu por estos métodos nun diba garantizar la independencia necesaria y deseyable que ha d'imperar nun ente públicu de comunicación al dexar a los auténticos profesionales representación nel Conseyu Asesor, que namás tien calter consultivu