Sigue la tramitación de la estación d’esquí n’Ayer

La Comisión d'Asuntos Mediuambientales (CAMA) del Principáu d'Asturies dio de pasu esta mañana la viabilidá mediuambiental del proyectu d'estación d'esquí "Fuentes de Invierno" el proyectu de mayor presupuestu que quier facer esti añu la Conseyería de Cultura y que tien por escenariu la fastera del Puirtu Braña, nel conceyu d'Ayer

El proyectu presentáu pol executivu asturianu y acabante d'aprebar pol organismu consultivu del Principáu en materia de mediu ambiente tien 14 pistes d'esquí que faen ente toes 8'4 km y cinco remontes, (trés telesielles, un telesquí y un tapiz rodante), una carril d'accesu de 800 m y dos aparcaderos. La CAMA peritó l'impactu mediuambiental de les instalaciones como "moderáu" mientres que l'impactu paisaxísticu mereció la calificación, muncho más dura, de "severu" anque'l mesmu informe reconoz que coles midíes protectores que s'enxerten en proyectu esi impactu tendrá de menguar

La CAMA fizo tamién proposiciones qu'encamiente que s'enxerten na Declaración d'Impactu Ambiental de la estación col envís d'enxertala meyor nel mediu que l'arrodia. Estes propuestes van dende la depuración de toles agües residuales hasta la reforestación de la rodiada de la estación y poner pación nes pistes p'afalar el pasu d'especies animales fuera de temporada. La CAMA punxo tamién llendes al tiempu que pue tar funcionando la estación al añu, l'emplegu de vehículos de motor, y la creación y acondicionamientu de miradores y sitios d'espardimientu. L'informe de la CAMA manda tamién facer un programa de vixilancia ambiental con informes periódicos