Sigue la polémica polos vuelos baratos

La Unión de Consumidores d'Asturies entró al debate sobre la llegada a Asturies de compañíes de vuelos baratos.

Tres de l'anuncia por parte de la Cámara de Comerciu d'Uviéu de la esistencia de negociaciones con compañíes de vuelos baratos col oxetivu de que punxeren servicios en Ranón, el Gobiernu asturianu, al travíes de la Conseyería de cultura y la d'Industria dio versiones distintes sobre l'estáu d'eses negociaciones y la conveniencia en que compañíes como Ryanair o Easyjet vinieren a Asturies. Esta selmana, tribunes en prensa firmaes pol Secretariu Xeneral de los empresarios asturianos Severino García Vigón, nes que se quexaba de la falta d'enfotu por parte del Gobiernu asturianu por sacar alantre los vuelos baratos vieno a echa-y más madera al fueu, y agora ye la Unión de Consumidores d'Asturies (UCE-Asturies) la qu'entra tamién al trapu.

Dacio Alonso, presidente de la UCE asturiana, diz que la entrada de la FADE na polémica polos vuelos baratos respuende a un intento por tapar les implicaciones de la venta ad'HC a Electricidade de Portugal, que, según Alonso, implica'l treslláu a Lisboa del centru de decisión d'Hidrocantábrico. La UCE Asturiana nun entiende por qué va un añu la presencia mayoritaria de Caxastur n'HC yera lo meyor al paecer del empresariáu asturianu qu'agora se desfai n'allabancies a la operación de compra d'EDP.
Respective a la polémica polos vuelos baratos, Dacio Alonso echa de menos que la FADE-y plante cara al dominiu d'Iberia y Spanair, que diz que ponen precios artificialmente altos aprovechando la posición de monopoliu que disfruten.

Yá l'añu pasáu el Gobiernu asturianu, de resultes d'una denuncia de la UCE, multó a Iberia y Spanair por publicidá engañosa sobre unes ufiertes de vuelos a baxu preciu dende Ranón. Mientres, pela otra banda, al presidente de la UCE asturiana abúlta-y positiva la entrada al mercáu de compañíes de vuelos baratos, pero tampoco ve bien que los gobiernos autonómicos se dediquen a "cazar" a estes compañíes con perres públiques.

El viaxeru asturianu tien una bona ufierta de vuelos baratos siempre que los garre n'aeropuertos de comunidaes de la nuestra rodiada. Mientres Easyjet ofrez vuelos baratos a Inglaterra dende Bilbao, Ryanair yá fai otru tanto dende l'aeropuertu de Valladolid, que tien llinia con Inglaterra y Bélxica, y va entamar, dende'l mes qu'entra, otra llinia con Inglaterra dende l'aeropuertu de Santander, pa la que yá s'anuncien na web de la compañía precios escandalósamente baxos. La compañía irlandesa tien tamién un tratu peslláu pa poner llinia ente Zaragoza y Llondres. En cuantes a la ufierta de vuelos en Ranón, el Principáu robló va poco un alcuerdu con Air Nostrum que va conectar, dende'l 31 d'ochobre Asturies con vuelos diarios a Málaga, Sevilla y Valencia, y otros, yá con periodos selmanales, a Alicante, Palma de Mallorca, Bruseles, Llondres y París, pero evidentemente, non a los precios que dan les compañíes barates.