Sigue la polémica pola Autovía del Seya

El Ministeriu de Fomentu presentó esti veranu una nueva alternativa pa la construcción de la "Autovía del Seya" que recibiere milenta documentos d'alegaciones cuando sepresentaron les sos priomeres alternatives de trazáu. la variante nueva, que tien el númberu 5 d'ente les que proponía Fomentu, fai la infraestructura más curtia, pasando a tener 14 kilómetros de los más de venti que teníen los primeros proyectos. Aparte d'ello, bien del trayectu, que pasa pela marxe derecha del ríu va metío per un túnel.

Sicasí, la variante nueva tampoco nun tien munchu sofitu, y va recibir otru bastiazu d'alegaciones, ente elles les de la Coordinadora Ecoloxista d'Asturies, que les presentó la otra selmana. La organización sorraya que l'alternativa nueva pa la carretera sigue encontándose, igual que les anteriores, nos datos de tráficu del 2.001, enantes de qu'entamare a funcionar l'Autovía del Cantábricu, que baxó enforma'l tráficu na oriella del Seya, y alvierte que'l proyectu representa la destrucción de bien del preparque de los Picos d'Europa. Neto que nes alegacionesa les primeres variantes, los ecoloxistes sorrayen que los atascos que se dan en Cangues d'Onís los fines de selmana nun precisen d'autovía, y qu'esi problema podía iguase con una variante qu'evitare pasar pela villa y unos aparcaderos.

Sobre'l trazáu de túneles, que Fomentu presenta como una manera de menguar l'impactu visual de la obra, la Coordinadora alvierte del posible dañu sobre'l sistema de cueves enterraes y sobre la rede hidrográfica del llugar, que nun tan estudiaes convenientemente