Siero va siguir alantre col serviciu de normalización

La decisión de la Conseyería de Cultura de sustituyir los convenios colos conceyos pa entamar servicios de normalización por "subvenciones nominales" que nun puen emplegase pa gastos de personal tampoco nun echa p'atrás pel momentu al conceyu de Siero.

El de Siero ye ún de los trés casos afectaos pola decisión de Cultura de sustituyir los convenios colos conceyos pa entamar servicios de normalización por "subvenciones nominales para la promoción y normalización del asturiano" una decisión que supón un enzancu pa que los servicios de normalización de Siero, Comarca de la Sidra y Mancomunidá del Cabu Peñes puean echar a andar.

Ello ye que nel casu de Siero, aparte del conveniu que se taba negociando con Cultura y que tenía un importe previstu de cerca de 5.000 euros, el conceyu yá tenía acutada una partida presupuestaria de 18.000 euros pa contratación de personal cola qu'echar a andar el serviciu nesti añu 2.004. Xunta esta partida, los responsables de la creación del serviciu de normalización cuenten con que la política de normalización idiomática, como asuntu tresversal a toles estayes de gobiernu del conceyu, contare d'otros departamentos y conceyalíes dientro d'una acción xeneralizada qu'amás formare y concienciare en cuestiones llingüístiques a tolos funcionarios.

Con too y con ello, dende llueu, la conversión del conveniu n'ayuda supón un problema, sobremanera a la hora d'asegurar la supervivencia del serviciu nun futuru y tamién a la hora de "institucionalizar" el serviciu y ser a da-y continuidá nun futuru, según comentaron a Asturies.com fontes del Conceyu de Siero.