Sidra d’Asturies entama prebes d'esta bébora los martes na FIDMA

La Denominación d’Orixe Protexida Sidra d’Asturies entama esti martes la primer preba de sidra que tien previsto celebrar nesta edición de la FIDMA. Los participantes van poder beber cuatro palos distintos acompañaos de quesu Cabrales.
 
Los asistentes a la preba van conocer de primer mano les escelencies de cuatro tipos de sidra DOP de cualquiera de les modalidaes esistentes, como la natural, la espumosa y la de nueva espresión. “Esplicaráse-yos tol procesu d’ellaboración, los controles de calidá que se faen, aprenderán a echar un culín, asina como a saber cuála ye la meyor forma de conservar la sidra y a qué temperatura ha de bebese”, señalen dende Gustatio Comunicación, organizadores del eventu. D’esta forma, el Conseyu Regulador pretende que los asturianos y visitantes que visiten la Feria Internacional de Muestres d’Asturies (FIDMA), que cumple 55 ediciones esti añu, “tengan la oportunidá de valorar lo que supón la etiqueta” que certifica la Denominación d’Orixe, amás de “concienciar” sobre la importancia de consumir productos del país “fechos con materia prima llocal, lo que permite crear emplegu y riqueza nel territoriu cercanu”.
 
P’acompañar la bébora, la organización va ufrir, tamién de baldre, quesu Cabrales en dos modalidaes: lleche de vaca y tres lleches –vaca, cabra y oveya–. Los interesaos en participar nesta preba, que va repetise tamién el martes próximu, han d’inscribise dende güei nel stand de ‘La Terraza del Cuco’, onde van celebrase a partir de les 18 hores, o en Gustatio Comunicación. El númberu máximo de persones que tomen parte en cada preba va ser de 50.