"Si pretenden metenos mieu, van per mal camín"

Estes son les declaraciones que fizo ún de los representantes de la Xunta Pola Defensa de la Llingua Asturiana na mañana de güei na rueda de prensa convocada dempués de qu'ocho de los sos militantes, que
ficieron una protesta énte la Ilesia de Cuadonga al pasu del Presidente
asturianu Vicente Álvarez Areces el pasáu Día d'Asturies,
recibieren estos díes notificación, que puede vese equí, de la Delegación del
Gobiernu avisándolos d'apertura d'espediente sancionador. L'únicu
encontu de l'acusación ye la de "dar voces y portar pancartes
contra la xestión del Presidente"



El pasáu 8 de setiembre, con motivu de la celebración del
Día d'Asturies, un garapiellu de miembros y simpatizantes de la Xunta
Pola Defensa de la Llingua ficieron una protesta na esplana de la
Basílica de Cuadonga, onde, como ye tradición, taba'l Presidente
asturianu Vicente Álvarez Areces. Al pasu d'Areces camín de la
ilesia, el grupu de militantes de la Xunta, encabezáu pola
característica pita de la xunta, entamó a dar voces de
"oficialidá" y protestar contra la
situación de la llingua asturiana. La protesta nun pasó de
l'altura onde taba'l retén de la Guardia Civil encargáu de la
seguridá del acontecimientu, procediendo los axentes a identificar a
tolos participantes na concentración.



En pasando un mes dempués d'aquello, los militantes de la Xunta
recibieron nos sos domicilios unes cartes certificaes nes que se-yos comunicaba
la incoación d'un espediente sancionador por infracción
alministrativa. Los fechos constitutivos de delitu, según la
Guardia Civil de Cangues d'Onís foron los de "dar voces contra
la comitiva del Gobiernu Rexonal, a la qu'abordaron en grupu portando pancartes
contra la so xestión". Pa delegación de gobiernu
ello ye constitutivo de delitu en cuantes que va contra l'artículu 26i
de la Llei de Seguridá Ciudadana (la famosa ""Llei Corcuera"")
que diz que ye "infracción lleve alteriar la seguridá
colectivo o armar desórdenes en víes, sitios y establecimientos
públicos". La multa que se-yos pide pue llegar a los 300,50
euros.

Pa Xulio Casado y Pablo Rodríguez Alonso esta denuncia ye "una actu claru contra la llibertá d'espresión y contra la denuncia política", considerando esti casu como ún "ensin precedentes na democracia n'Asturies". Pa los militantes de la Xunta esta ye una sitaución surrealista porque "por pidir al gobiernu que cumpla la so propia llei, múltennos". Nesti sentíu la Xunta fai corresponsables d'esta denuncia "non solo a la delegación del gobiernu, que ye d'onde parte la denuncia, si non tamién a tol gobiernu asturianu, dende'l PSOE hasta los sos socios de gobiernu".



Los militantes acusaos respondieron a la denuncia con un escritu
d'alegación nel que s'argumenta que taben exerciendo'l derechu
constitucional a manifestase y nel qu'alvierten que se ta xulgando y emplegando
como criteriu pa la sanción "el conteníu de les idees
o reivindicaciones que pretenden espresase" y deféndense
diciendo que'l "derechu a manifestación pública nun
pue sometese a controles d'oportunidá política". Na
so defensa, los militantes acusaos asoleyen xurisprudencia del Tribunal
Superior de Xusticia de Valencia y del mesmu Tribunal Constitucional. Los
acusaos nun nieguen los fechos, pero tampoco nun entienden qu'ellos seyan
constitutivos de delitu nengún, y, en cuantes que la denuncia ta
redactada en términos colectivos, pregunten de qué se-yos acusa
individualmente a caún d'ellos.



La primer reacción al casu de les multes pola protesta en
Cuadonga vieno precisamente d'un de los socios de gobiernu, el Bloque por
Asturies, qu'asegura nun comunicáu oficial "nun salir del so
plasmu énte l'anunciu de l'apertura d'espediente
sancionador". El BpA valora los fechos como "un
escandalosu y provocador intentu de criminalizar un movimientu y, en concreto,
una reivindicación dafechu pacífica, como fue y son toles que
lleva a cau na cai la Xunta pola Defensa de la Llingua Asturiana".
La organización de Rafael Palacios declárase
"sorprendida pola ceguera política de quien creen que pel
camín del nengunéu institucional o de la represión
alministrativa van ser a desautorizar, amenorgar o silenciar una
histórica reivindicación que, convién recordalo, fai
propia más del 60% de la población asturiana"