Ser Asturianu ufre rutes n'asturianu al rodiu la Revolución d'Ochobre del 34 y la Guerra Civil

|
Salida 'Xixón ¡en guerra!' de Ser Asturianu

Van desendolcase nes selmanes próximes n'Uviéu y en Xixón, de manera respeutiva.

Esta fin de selmana tornen les visites en llingua asturianu de Ser Asturianu, de les que s'encarga'l guía oficial Denis Soria. Unes salíes que se van facer con toles midíes de seguranza frente a la COVID-19.

La primera va ser 'La ruta de la Revolución d'Ochobre de 1934' el vienres, a les 19 hores, "un viaxe a la Revolución d’Asturies de 1934, l’acontecimientu más importante que vivió Uviéu en tol sieglu XX". Per 120 minutos, los participantes van facer un "itinerariu históricu pa conocer la última revolución obrera d’Europa occidental".

Esta ruta va repetise'l sábadu 1 de mayu, Día del Trabayador, y el vienres 7 de mayu a la mesma hora. La salida va tener llugar n'El Fontán.

Tarifa de 10 euros

El sábadu, a les 19 hores, va arrancar 'Xixón ¡en guerra!', "panorámica xeneral de la Guerra Civil na ciudá de Xixón, ente’l branu de 1936 hasta la cayida del Frente Norte n’ochobre de 1937". La ruta va percorrer "escenarios clave a lo llargo de la contienda, l’aniciu de los primeros combates, la sede del Conseyu Soberanu d’Asturies y Llión, la prisión provisional o los principales refuxos antiaéreos, averándomos a les secueles del asediu dempués de 15 meses de bombardeos sobre población civil".

Otres oportunidaes pa participar nesta salida, d'un llargor de 90 minutos, son el vienres 30 d'abril y el sábadu 8 de mayu, tamién a les 19 hores. El puntu d'alcuentru ye'l Teatru Xovellanos.

Pa participar nestes visites guiaes ye necesario actuar plaza nel corréu electrónicu infoserasturianu@gmail.com o nos númberos de teléfonos 626.221.712 y 639.414.216. Les tarifes son de 10 euros, de 5 pa menores, qu'han de dir acompañaos d'un adultu.

Na semeya, una salida per Xixón el mes pasáu na plaza del Institutu (El Parchís) onde ta asitiada la Casa Blanca, sede del Conseyu Soberanu.

Contador Estadistiques