‘Sentir Asturies’, un magacín pa les nueches n’asturianu de RPA

Estrénase en RPA ‘Sentir Asturies’, espaciu que va cubrir los martes y miércoles la franxa de 23.30 a 00.30 hores que la radio pública dedica dende esti mes per selmana a espacios n’asturianu. Arantxa Margolles y Inaciu Galán dirixen esti magacín de conteníos xenerales con vocación d’informar y entretener.

Cuatro Gotes Producciones entama esti proyeutu que pretende dar a conocer “qué ta asocediendo al nuesu alredor, fuera d'Asturies y los nuevos enclinos nes redes sociales, la cultura y la tecnoloxía”. Too nun tonu distendíu y col asturianu como llingua vehicular.

Margolles y Galán van contar nestes dos hores selmanales de radio con collaboradores pa falar de distintos temes. Nel debú d’esta nueche van tocase aspeutos de moda, d’historia o ‘lleendes urbanes’ y pelos micrófonos de RPA van pasar Llucía Miravalles, Xuan Nel Turiel, Faustino Zapico y Lucía Montejo.

L’equipu de collaboradores amplíase con nomes como los de Pilar Sánchez Vicente, David Fernández, Marcos Salazar, Lluis Fanjul, Jennifer Berrocal, Víctor Suárez, Ivan Llera, Nuria López o María Esther García. “‘Sentir Asturies’ quier llegar a un públicu nuevu, que se sienta identificáu cola nuesa forma de ver l'actualidá y Asturies. Pero non por ello va dexar fuera a otru públicu d'edá más avanzada o que peracaba otru tipu de conteníu”.

Tamién va afalase la participación de los oyentes yá sía al traviés de les redes sociales o de mensaxes al programa per WhatsApp. Nesi sen, ta abiertu’l númberu de teléfonu 621.279.215.

Ente los conteníos, rescampla una seición dedicada a asturianos que viven n’otros países, un espaciu de radioteatru dirixíu por Sergio Buelga o ‘El diván de Galán’, onde’l periodista va averar a protagonistes asturianos perte medies d’una entrevista mui personal plantegada como una terapia musical con trés temes escoyíos pol protagonista. Rodrigo Cuevas va ser l’encargáu d’estrenalu mañana.

Programación en llingua asturiana

Con ‘Sentir Asturies’ complétase la franxa horaria de 23.30 a 00.30 que RPA dedica dende esti mes a la llingua asturiana. Los llunes emítese’l programa musical ‘Al son’ y los xueves la serie de radioteatru ‘La ciencia del cuentu’, dambos por mor de la collaboración económica de la Conseyería de Cultura, Política Llingüística y Turismu al traviés de la convocatoria ‘Asturies crea cultura / Asturies crea sinerxes’.

Hasta’l momentu, la única presencia del idioma na radio pública taba nel boletín informativu de les 12, d’unos 10 minutos de llargor.