Sentencia xudicial contra Río Narcea n'Extremadura

Con nome asturianu, capitales del Canadá, esplotaciones mineres en tola península ibérica y un productu, l'oru, que cotiza en tolos mercaos mundiales, Río Narcea Gold Mines ye una de les empreses más globalizaes de les qu'operen n'Asturies, como demuestra tamién el fechu de que procese nes plantes asturianes mineral procedente d'Islandia. Rematada yá la so primer fase d'espansión, qu'entamó en 1996 al abrise les mines d'oru de Carl.les (Cangas del Narcea) y Miranda, anguaño cásique escosaes, la empresa minera ta faciendo sondeos en Salave, nel conceyu de Tapia, onde de confirmase la bayura aurífera del subsuelu les máquines modernes podríen afondar nos furacos que yá se ficieron n'otra dómina a la gueta del metal mariello

Mientres, Río Narcea abre mines n'otros llugares, casu de Monesterio, un llugar ente Extremadura y Sevilla onde la empresa recibió l'añu pasáu el preste alministrativu pa entamar la mina d'Aguablanca, un yacimientu de níquel n'abertal que tien rabiaos a tolos ecoloxistes extremeños y andaluces y tamién a los vecinos.

El proyectu de mina cuenta con abrir furacos y cráteres nun espaciu de 23 hectaries que ta atiestando con dos núcleos d'espaciu protexíu que se pretende que seyan reserva natural de la biosfera. Pa más aquello, la mina pue alterar enforma la economía del llugar, una fastera privilexada onde la tasa de paru ta bien perbaxo de la media y la cría del gochu ye un negociu qu'aporta bien de perres a la xente del llugar. Otramiente, la mesma empresa reconoz que la tasa de niquel nun ye mui grande, polo que la rentabilidá de la mina va ser tirando a baxa.

La propia Río Narcea fala d'esplotar el yacimientu a un plazu d'once años por culpa d'esto, pero en casu de nun traer cuenta la mina podría abandonase primero, dexando de regalu una balsa d'estériles atacada de metal pesao en suspensión asemeyada a la que dexó Boliden. Pa más aquello, la obra de la mina amenaza directamente a les canales que lleven l'agua que consume la ciudá de Sevilla, razón que los ecoloxistes estremeños llevaron coles otres al xulgáu de Badajoz, que mandoó, en sentenciu fecha pública la otra selmana, parar dafechu la obra por carecer de los permisos obligatorios.

Esta sentencia vien dempués d'otra que s'asoleyó en xineru y que yá d'aquella mandaba tornar tolos llabores que se taben faciendo. Río Narcea punxo un recursu y siguió trabayando con normalidá a lo llargo de tou esti tiempu, nel que s'arrancaron árboles de más de cien años y nel que se causó un dañu al mediuque los conservacionistes estremeños califiquen de "irreparable". Sicasí Ecoloxistes n'Acción d'Extremadura nun queden a gustu cola sentencia y dicen que "agora ye'l momentu d'apautar les responsabilidaes xudiciales y alministratives" pidiendo una fuerte multa,al mesmu tiempu que denuncien la permisividá de les autoridaes cola empresa.

Más información nesti enllace