Senén Rivero analiza la historia de la prensa en Villaviciosa

L'historiador Senén Rivero écha-y el piesllu esti vienres al segundu ciclu de los Vienres Culturales de la Fundación José Cardín de Villaviciosa, cola conferencia "Les publicaciones periódiques na Historia villaviciosina". La conferencia, que va tener llugar a les 19,30 hores, va facer un recorríu pela historia de la prensa en Maliayo, valiéndose pa ello del estoyu personal del mesmu conferenciante, que tien un archivu nel que s'alcuentren esemplares de bien de los periódicos antiguos, llibros y documentos que se dieron a imprenta en Villaviciosa a lo llargo de la historia.

Nacíu en Villaviciosa nel 1958, Senén Rivero Cueto ye llicenciáu en Xeografía pola Universidá d'Uviéu y ye director de "Ediciones La Oliva" editorial especializada en llibros de temática local casu de "Villaviciosa y su progreso", "Villaviciosa en 1934", "El siglo XX en Villaviciosa", "Ayuntamiento de Villaviciosa. Centenario de la Casa Consistorial 1906-2006" o "Villaviciosa en fotos antiguas, 1859-1936". Amás de ser autor de parte d'estos llibros, Rivero tien asoleyaos artículos sobre temes como la prensa socialista n'Asturies, ente otros.