Selmana en positivo nes bolses

Les xubes d'últimos de la selmana ficieron posible un bon pieslle. L´Ibex-35 medró hasta raspiar la llende de los 7.000 puntos, mangándose nos 6.968,60 puntos con una xuba'l vienres pasáu del 1,9%, confirmando'l rebote técnicu nes bolses dempués de dos selmanes de cayíes xeneralizaes. Ello foi que'l parqué madrilanu movió bien de perres con una inversión de 2.800 millones d´euros de los que 700 foron d´aplicaciones. Los más de los valores escaparon de les perdes de pa entamar xubes curioses, anque entovía hai mieu ente los inversores por una posible sobrevaloración de dellos valores tecnolóxicos.


Ente les estadístiques más señeres tan los datos d´inflación nos países europeos. L´IPC nel Estáu Español medró una décima colo que´l datu interanual ye del 2,7%, penriba del oxetivu marcáu nel 2%. El datu d´inflación francés da una xuba del 0,2% colo que´l IPC interanual de Francia ye del 2%, mientres que'l resultáu de la balanza comercial de Francia foi de 338 millones d´euros, perbaxo de la previsión de 500 millones. Datu negativu tamién de la producción industrial nel país galu con una baxada del 0,2%. Nos Estaos Xuníos destaquen el datu de la balanza comercial, con 41.800 millones de dólares negativos y el del indiz de precios de producción, que medró un 0,5%.

Nes bolses internacionales l´índiz Nikkei de Tokio tuvo una importante cayida por culpa de los resultaos de les empreses tecnolóxiques. De fechu, la cayida ye la más bultable de va tres meses y mediu p'acá. Les xubes en Wall Street vinieron pola anuncia de creación d'un fondu pa los afectaos pol amiantu col consiguiente beneficiu pa les cases de seguros. El xiru de futuros del mercáu norteamericanu tamién ayudó a que dellos inversores mercaren asgaya nun ambiente positivu. El Dow Jones trancó la selmana nos 1.733,90 con una xuba del 1,05%. L´índiz tecnolóxicu Nasdaq medró penriba´l 1%. Los bonos datos de General Electric aposentaron a los inversores de Wall Street y tamién foron bona noticia pa los mercaos internacionales, y ye que'l conglomeráu General Electric dio anuncia de qu´esti añu'l crecimientu de la empresa diba oscilar ente´l 3% y el 7%. El valor de la cadena minorista Home Depot tamién emburrió a Wall Street, mientres que nel Vieyu Continente les xubes moderaes marcaron una selmana de ganancies. Les bolses de París y Francfort pesllaron el vienres penriba´l 1,5%. Les empreses aseguradores europees tamién se beneficiaron del bon comportamientu del sector asegurador al otru lláu del Atlánticu.

La Bolsa de Madrid tuvo una bona selmana pesllando cola meyor xuba nel continente. La noticia estrella foi la entrada de la familia Entrecanales, propietaria de la constructora Acciona, nel accionariáu de la constructora FCC. El casu ye que de los 700 millones d´euros d´operaciones del vienres pasáu, 285 yeren de la compra del 8,7% del capital de FCC por parte d´Acciona. Los valores de la construcción tornen al primer planu énte los nuevos rumores d´operaciones corporatives dientro´l sector. Perimportante xuba del 6% del Banco Atlántico pol ruxe-rux sobre los sos posibles compradores. Ente los demás valores, bona selmana nel Grupu Telefónica -sacantes Terra- y xuba d´Endesa penriba´l 1,5% al dar anuncia del interés por mercar la francesa Snet. BBVA y SCH tamién pesllaron la selmana en positivo, destacando nel llau de les perdes Unión Fenosa y Gas Natural.

Los analistes sofiten les últimes xubes na liquidez qu'hai en mercáu mentantu dellos brokers apuesten por una cenciella xuba técnica en rempuesta a les últimes cayíes. Nel parqué madrilanu ye fácil que vaya haber dalguna OPA más y que delles empreses salgan del mercáu. Recoletos, por poner un casu, ta pa salir de bolsa pola mala traza que presenta'l valor y poles males perspectives de la empresa.

El preciu del barril Brent asistiose nos 29,5 dolares, un crecimientu nel preciu del 2%. El encarecimientu nel preciu del oru prieto vien por daqué tan coyuntural como ye'l mal tiempu nos Estaos Xuníos, con tormentes de veranu y tornaos, circunstancia que pue dificulta-y la importación de petróleu. Tamién influye nel preciu del petróleu la inestabilidá en Nixeria y lo despacio que van les esportaciones de petróleu iraquino. L´otru oru, lo mariello, baxó'l 0,3% y la onza val agora 344,5 dólares. Nes divises, l'euru asistiose nos 1,13 dólares y bien d'empreses europees critiquen que la fuerza de la moneda continental ta cortándo-yos les esportaciones.