Selmana en negativo pa les bolses

Les duldes de los inversores, y les poques razones pa invertir na renta variable ficieron una selmana a la baxa. A la contra la cotización del euru, el preciu del petroleu y los bonos animaron a esgaya'l restu de los mercaos financieros. La Reserva Federal ya ta preparando la próxima xuba nos tipos d'interés, mentanto que n'Europa se caltién el preciu de les perres yá que'l BCE nun ta pol llabor de camudar el cuadru macroeconómicu estimáu pa esti añu, mentanto, los resultaos empresariales dan anuncia d'una meyora del sector tecnolóxicu. Otramiente, l'Ibex tuvo una selmana de perdes anque llogrando asitiase penriba de la cota psicolóxica de los 8.000 puntos.

Selmana llena de males anuncies ente la que destaca'l mal datu de xorrecimientu del PIB de Xapón. Dempués de dellos meses de recuperación y esperanza la economía xaponesa sigue con munches duldes. El riesgu de que la feble economía xaponesa afeute al restu d'Asia ye un peligru que nun-y presta a la comunidá inversora. El PIB de Xapón algamó una probetaya xuba 0,3%, en tanto que los economistes esperaben una xuba del 0,8%. Xunta esto los mercaos frenáronse col profit warning de la multinacional Alcoa. Estes alvertencies de les empreses ponen tamién munches duldes al rodiu la renta variable. Ente les estadístiques de la selmana destaquen l'índiz de precios de producción d'Estaos Xuníos que tuvo una cayida del 0,1%, mentanto que la balanza comercial norteamericana tuvo d'un déficit de 51.000 millones de dólares. Na Zona Euru'l datu de la balanza comercial de Francia qu'algamó los - 437 millones d'euros y l'IPC d'Agostu del Estáu Español foi del 0,4%.

Solo al finar la selmana les bolses tuvieron una xuba dempués de dir a la baxa los díes anteriores. En Wall Street l'índiz Dow Jones asitióse nos 10.313,07 puntos con una xuba del 0,23%. El tecnolóxicu Nasdaq mangóse nos 1843,91 puntos con una xuba del 1,32%. Nel Vieyu Continente foron les empreses tecnolóxiques les más animaes nes bolses ya que los mercaos europeos pesllaron en negativo.

Selmana de perdes pal selectivu Ibex-35 qu'asitióse nos 8.055,90 puntos, una cayida al rodiu'l 1% na selmana. El volume de negociu foi mui baxu algamando los 1.314 millones d'euros na que foi una bolsa mui televisiva, ya que Tele5 ta entamando una xuba llibre nel parqué madrilano, mentanto que'l valor Antena3 ta calentando motores ante l'anuncia del asturianu Blas Herrero de que la televisión Antena3 "ye Opable". El casu ye que l'empresariu astur Blas Herrero ta a puntu de recibir los 200 millones d'euros que-y deben convertiéndose nun de los empresarios millonarios del país. Les ganancies foron bien probetayes y nel terrén de les perdes destacaron Endesa, Abertis y Altadis que tien delles perdes na filial francesa poles nueves midíes del gobiernu francés de xubir el preciu del tabacu.

Nueves escuses pa que los especuladores sigan ganando perres col petroleu. Agora ye'l furacán Iván que pon en peligru l'abastecimientu de petroleu pola llende de México. El preciu del barril de petroleu Brent mangóse nos 42,40 dólares. Según la OPEP la tercer parte del preciu del petroleu d'anguaño ye por cuestiones meramente polítiques y que nun respuenden a problemes d'abastecimientu o producción.

Perbona selmana pal mercáu de renta fixo onde los bonos foron mui demandaos polos inversores. La rentabilidá del bonu alemán foi del 4,05 y les espectatives d'una xuba de los tipos nos Estaos Xuníos ta poniendo un nuevu marcu de tipos mui lloñe de los últimos años. El mercáu de bonos tuvo la meyor selmana nes últimes cuatro. Otramiente, la cotización de la divisa europea viose beneficiada polos febles datos macroeconómicos d'Estaos Xuníos. El dólar tuvo una selmana de cayíes, mentanto que l'euru asitióse nos 1,23 dólares unidá. L'euru tamién meyoró cotización frente a la divisa xaponesa, ya que'l yen xaponés entamó perimportantes cayíes pol mal datu de xorrecimientu económicu de Xapón. Les cayíes del dólar tiraron p'arriba del preciu del oru, el metal amariello asitióse nos 402,5 dólares onza.