Selmana en negativo na economía mundial

Les Bolses nun tuvieron una bona selmana, coles ventes tirando p'abaxo de los índices. Les xubes nel preciu del petroleu y les duldes macroeconómiques nun prestaron a la comunidá inversora que desfizo posiciones en renta variable. Xunta esto'l resultáu de les elecciones presidenciales nos Estaos Xuníos va influir sobremanera a los mercaos. Según les últimes encuestes y a unes poques selmanes a les votaciones los dos candidatos George W. Bush y John Kerry tienen unes intenciones de votu mui asemeyaes. Los analistes políticos y económicos del otru llau del Atlánticu ya tan dando anuncia de la posibilidá d'unes elecciones tan perxudiciales pa les Bolses como foron les de cuatro años enantes.

Selmana de munches estadístiques, concentraes les más d'elles nos Estaos Uníos. Na primer potencia económica diérense anuncia de datos de producción industrial peores de lo estimao, de capacidá d'utilización perbaxo les previsiones, de ventes al por menor mui perbaxo les espectatives y l'índiz de confianza de la Universidá de Michigan, qu'algamó 87,5 se contaba con 94 . Na Zona Euru tamién se dio anuncia de datos estadísticos: n'España la balanza por cuenta corriente de xunetu foi de -3.736 millones d'euros; la balanza por cuenta corriente francesa d'agostu algamó -1.486 millones d'euros, muncho peor de lo esperao. Solo la balanza comercial d'Italia del mes d'agostu tuvo un resultáu positivu de 1.111 millones d'euros.

Selmana de menos a más nes bolses internacionales. Asina, Wall Street dempués d'una feble selmana'l algamó un pieslle en positivo. L'índiz Dow Jones peslló nos 9.933,38 puntos (+0,39%). El tecnolóxicu Nasdaq trancó nos 1.911,50 puntos (+0,45%). Nel Vieyu Continente les bolses tuvieron resultaos mistos anque los más de los parqués pesllaron en negativo. Francoft foi la más dañada con perdes del 0,47% nel Dax.

Cayida del 0,7% del selectivu Ibex-35 asitiándose nos 8.261,10 puntos. Permala selmana na Bolsa de Madrid onde solo'l mercáu de futuros frenó les perdes. Les duldes nel parqué madrilanu ficieron perder la cota sicolóxica de los 8.300 puntos anque los brokers tienen enfotu entovía en facer un cuartu y últimu trimestre positivu y rentable. El volume de negociu algamó los 1.520 millones d'euros. Los valores que más ganaron el vienres foron Gamesa, NH Hoteles, Telefónica Móviles y Zeltia. Nel terrén de les perdes destacaron Bankinter y Sabadell.

La xuba del preciu del petroleu paez que nun tien tope, anque al final de la selmana tuvo unes correcciones técniques con pieslle a la baxa. La inestabilidá de países productores, la importante xuba nel consumu enerxéticu d'Estaos Uníos y les escases reserves del país, la especulación nos mercaos internacionales y sobremanera l'ablucante demanda de petroleu de China pinten un escenariu mui negativu a la cayida del preciu. Con too y con ello'l pieslle a la baxa de la selmana dexó'l Barril Brent nos 49,67% (- 3%).

Cayida nel mercáu de renta fixo onde' bonu de referencia, el bund alemán, asitióse nuna rentabilidá del 3,886%. Meyor pintó'l mercáu del metal mariello con una xuba de cotización hasta 418 dólares onza. Otramiente, l'euru tuvo una bona selmana, cotizando la divisa europea a 1,2478 dólares unidá, la más baxa en siete meses. El casu ye que los inversores enfótense más na economía europea que na norteamericana. Anque la primer economía del mundu ta medrando, entovía nun hai señes clares d'una recuperanza sólida.