Selmana de la llingua asturiana en Llangréu

Luis González Bada, Conceyal Delegáu d´Asturianu del Aytu. de Llangréu y Ramón d´Andrés Díaz, Xefe de la Oficina de Política Llingüística del Principáu d´Asturies inauguren a les 7 y media d'esta tarde les xornaes de la IV Selmana Cultural n'Asturianu de Llangréu, que van entamar col conferencia de Lluis Xabel Álvarez "De Conceyu Bable a l´Academia de Llingua Asturiana". Les xornaes van continuar el martes 30 col II Alcuentru d´Escritores del Valle del Nalón, nel que van participar Pablo Antón Marín Estrada, Helena Trejo, Pablo Rodríguez Medina, Xulio Arbesú, Xulio Berros y Ana Vanessa Gutiérrez. El miércoles los actos treslládense a la Casa de Cultura de Riañu, onde va celebrase una llectura de cuentos, siempre a les 7 y media de la tarde, mientres que'l xueves na Casa la Cultura de Sama va facese un debate sobre la prensa escrito n'asturianu, nel que va haber representantes de les principales cabeceres n'asturianu, ente elles Asturies.com. Les xornaes piesllen el 3 d'avientu en Teatru de La Felguera cola obra de teatru pa escolinos "La declaración", d´Arsenio Sánchez a cargu del Grupu Refaxu a les 10:30 de la mañana. Nel mesmu escenariu y a la mesma hora, les 10 y media, pero de la nueche, un conciertu del grupu folk Deua Dubra echa'l piesllu a la xornada.

Paralelamente a les xornaes, del llunes 29 de payares al vienres 17 d´avientu pue vese na Casa la Cultura de Riañu la esposición "Andrés Solar, una voz del Surdimientu" organizada pola Conseyería de Cultura con motivu de la Selmana de les Lletres.